მერია სოციალურად დაუცველი სტუდენტების დასაფინანსებლად განცხადებების მიღებას იწყებს
თბილისის მერია სოციალურად დაუცველი წარმატებული სტუდენტების დაფინანსების პროგრამის ფარგლებში, 2021-2022 სასწავლო წლის შემოდგომის სემესტრის სწავლის დაფინანსების მიზნით 10 სექტემბრიდან განცხადებების მიღებას იწყებს.
დაფინანსების მაქსიმალური ოდენობა წლიურად 2250 ლარია, სემესტრულად 1125 ლარი.
დაფინანსება დამოკიდებულია სტუდენტის მიერ წინა სემესტრში მიღებულ აკადემიურ მოსწრებაზე. სოციალურად დაუცველ სტუდენტებზე სწავლის დაფინანსებისთვის თანხა გაიცემა სემესტრულად, წელიწადში ორჯერ.
“2021 წელს პროგრამაში გარკვეული ცვლილებები შევიტანეთ იმისთვის, რომ მეტ ახალგაზრდას ჰქონოდა შესაძლებლობა, დაფინანსება მიეღო.
2021 წლამდე ფინანსდებოდნენ თბილისში რეგისტრირებული ბაკალავრიატის, მაგისტრატურისა და დოქტორანტურის საფეხურის სტუდენტები, რომელთა ოჯახების სოციალური ქულა 70 000 ან ნაკლები იყო, დღეს ფინანსდებიან თბილისში რეგისტრირებული სტუდენტები, რომელთა ოჯახების სოციალური ქულა 150 000 ან ნაკლებია.
2021 წლის გაზაფხულის სემესტრში ამ ცვლილებების შედეგად 1400 სტუდენტი დაფინანსდა“,- აღნიშნა კახა კალაძემ თბილისის მთავრობის სხდომაზე.
განაცხადები დაფინანსებაზე 30 ოქტომბრამდე მიიღება.
