მამუკა მდინარაძე: მინისტრთა კაბინეტის თემაზე ჯერ არ გვისაუბრია
შეიცვლება თუ არა მინისტრთა კაბინეტი, ამასთან დაკავშირებით მსჯელობა ჯერ არ ყოფილა. ამის შესახებ „ქართული ოცნების“ აღმასრულებელი მდივანი მამუკა მდინარაძე აცხადებს.
„ჩვენ მინისტრთა კაბინეტის თემაზე ჯერჯერობით არ გვისაუბრია. ალბათ ისიც კი გაგიკვირდათ, რომ ძალიან სწრაფი გადაწყვეტილება მივიღეთ პრემიერ-მინისტრობის კანდიდატთან დაკავშირებით. შეიცვლება თუ არა ეკონომიკის მინისტრი ნათია თურნავა, ვინ დაიკავებს თავდაცვის მინისტრის თანამდებობას, ამას გაივლის ირაკლი ღარიბაშვილის ინიციატივით პოლიტსაბჭო. საბოლოო სიტყვა ეკუთვნის პრემიერობის კანდიდატს. ჩვენ ერთად ამ საკითხებზე შევჯერდებით და აუცილებლად მოგახსენებთ“,- განაცხადა მამუკა მდინარაძემ.
შეგახსენებთ, გიორგი გახარიამ პრემიერ-მინისტრის თანამდებობა დღეს დატოვა. მის შემცვლელად კი, „ქართულმა ოცნებამ“ ირაკლი ღარიბაშვილი დაასახელა.
