მაია ცქიტიშვილი: ირაკლი ღარიბაშვილს ვთხოვე, დავუბრუნდე ჩემს ოჯახს
მაია ცქიტიშვილი მინისტრთა კაბინეტის ახალ შემადგენლობაში არ მოხვდა. ინფრასტრუქტურის მინისტრის თანამდებობაზე მისი მოადგილის ირაკლი ქარსელაძის კანდიდატურაა დასახელებული.
როგორც მაია ცქიტიშვილმა ბრიფინგზე განაცხადა, მან პრემიერ-მინისტრობის კანდიდატს ირაკლი ღარიბაშვილს თავად სთხოვა, რომ აქტიური პოლიტიკიდან გასვლის საშუალება მიეცა.
„ირაკლი ღარიბაშვილს 15 წელია ვიცნობ. ძალიან ბევრი ერთობლივად გაკეთებული საქმე გვაკავშირდებს. მას გულწრფელად ვთხოვე, მომცეს საშუალება, დავუბრუნდე ჩემს ოჯახს, გამოვიდე აქტიური პოლიტიკური ცხოვრებიდან. ჩემთვის მისასალმებელი და საინტერესოა, რომ ჩვეულებრივი ადამიანის ცხოვრებაში დავბრუნდე. ვფიქრობ, ძალიან ბევრი სასარგებლო საქმე გავაკეთე სხვადასხვა პოზიციაზე“, - აღნიშნა მაია ცქიტიშვილმა.
მაია ცქიტიშვილი, ინფრასტრუქტურის მინისტრთან ერთად, პირველი ვიცე-პრემიერის თანამდებობასაც იკავებდა.
ინფორმაციისთვის, პრემიერ-მინისტრობის კანდიდატმა ირაკლი ღარიბაშვილმა მთავრობის ახალი შემადგენლობა დაასახელა.
