ლურჯი მიკროავტობუსები ერთიანი გადახდის სისტემაში ჩაერთვებიან
აპრილიდან ლურჯი მიკროავტობუსები ერთიანი გადახდის სისტემაში ჩაერთვებიან. შესაბამისი გადაწყვეტილება თბილისის საკრებულომ მიიღო.
დღეს არსებული წესით, საათნახევრის განმავლობაში ერთი გადახდის პრინციპით 2 სახეობის ტრანსპორტით, მეტროთი და ავტობუსით არის შესაძლებელი გადაადგილება. აპრილიდან კი, ამას ლურჯი მიკროავტობუსი დაემატება.
როგორც თბილისის საკრებულოს სატრანსპორტო საკითხთა კომისიის თავმჯდომარე შალვა ოგბაიძე „ბიზნესპარტნიორთან“ აცხადებს, შეღავათების პაკეტი, რაც მოქმედებს მეტროსა და ავტობუსში, გადავა ლურჯ მიკროავტობუსებში.
„ლურჯმა მიკროავტობუსებმა ნამდვილი საზოგადოებრივი დანიშნულება შეიძინეს, მიუხედავად იმისა, რომ კერძო კომპანიაა“, - აღნიშნა შალვა ოგბაიძემ.
მისი თქმით, ახალი მიკროავტობუსები მხოლოდ შიდა საუბნო გზებზე გადაადგილდებიან. მგზავრობის ფასი 50 თეთრი იქნება.
ამ ეტაპზე თბილისში 300 ახალი ლურჯი მიკროავტობუსი მოძრაობს.
