“ლიბერთი ბანკი“ მზადაა სესხს პროცენტი დააკლოს და 1 წლით ადრე კონტრაქტიც გაწყვიტოს - დეპუტატი  

ოპოზიციონერი დეპუტატის ალეკო ელისაშვილის განცხადებით, საპენსიო თემაზე სამუშაო ჯგუფის შეხვედრაზე, “ლიბერთი ბანკმა“ თქვა, რომ მზად არის, არა მხოლოდ სესხზე საპროცენტო განაკვეთი შეამციროს, არამედ 1 წლით ადრე კონტრაქტი შეწყვიტოს და ახალი პირობებით ტენდერში მონაწილეობა მიიღოს.   

“ლიბერთი ბანკის“ წარმომადგენლებთან შეხვედრაზე ძალიან მნიშვნელოვანი რამ მოხდა.“ლიბერთი ბანკმა“ თქვა, რომ არა უბრალოდ სესხებზე საპროცენტო განაკვეთებს შეამცირებს, არამედ 1 წლით ადრე მზად არის, გაწყვიტოს კონტრაქტი, რითაც წვალობდნენ პენსიონერები და უზარმაზარ, 36%-ში იღებდნენ სესხებს.

ისინი ამბობენ, რომ თუ ხვალ გამოცხადდება ახალი ტენდერი, ახალი პირობებით, მზად ვართ, ამაში მონაწილეობა მივიღოთ. მოვიგებთ -მოვიგებთ, წავაგებთ-წავაგებთ. რა თქმა უნდა, პრემიერთან გვექნება საქმე, რომ ახალი კომისია შეიქმნას, სასწრაფოდ, დაუყოვნებლივ. დარწმუნებული ვარ, უფრო დიდი წარმომადგენლობა იქნება ჩართული, ეს იქნება ამ ქვეყნის წარმატება, რომ პენისონერებმა სარგებელი ნახონ და 36%-ში არ იღებდნენ იმ სესხს“,- აღნიშნა ალეკო ელისაშვილმა.