კულტურის, სპორტის და ახალგაზრდობის სამინისტრო ცალკე უწყებად ჩამოყალიბდება
პრემიერ-მინისტრის გიორგი გახარიას განცხადებით, განათლების სამინისტროს, კულტურისა და სპორტის სამინისტრო გამოეყოფა.
მისი თქმით, კულტურასა და სპორტს, ახალგაზრდობაც დაემატება და ჩამოყალიბდება, კულტურის, სპორტის და ახალგაზრდობის სამინისტრო.
„უკვე ყველა ტექნიკური სამუშაო დასრულებულია და მომზადებულია მთავრობის დადგენილება, რომ განათლების სამინისტროდან გამოიყოს კულტურის, სპორტის და ამას დაემატება ახალგაზრდობის სამინისტრო. ეს არის უაღრესად მნიშვნელოვანი ნაბიჯი, როგორც ჩვენი კულტურის, ისე სპორტის სფეროს წარმომადგენლებისთვის.
ჩვენი კულტურული მემკვიდრეობა, ისევე როგორც თანამედროვე ხელოვნება, ჩვენი ყოველდღიური ცხოვრების ის უძვირფასესი ნაწილია, რომელზეც ჩვენ უნდა ვიზრუნოთ. აგრეთვე, გასათვალისწინებელია ჩვენი სპორტსმენების მიღწევები“, - აღნიშნა გიორგი გახარიამ.
