კოვიდ რეგულაციების დარღვევისთვის ჯარიმების მოცულობა ₾50 მლნ-ს აჭარბებს  - IDFI

კოვიდრეგულაციების დარღვევისთვის 112 991 ჯარიმა გამოიწერა, ჯარიმების საერთო მოცულობა 50 000 000 ლარს აჭარბებს. კვლევას IDFI ავრცელებს.

კვლევის თანახმად, ყველაზე მეტი დარღვევა, 31%  თბილისში გამოვლინდა. დარღვევების რაოდენობით 11%-ით მეორე ადგილს აჭარა იკავებს. მას მოჰყვება ქვემო ქართლი, რომელზეც გამოვლელინ სამართალდარღვევათა 9% მოდის.

2021 წლის თებერვლის ჩათვლით, პირბადის ტარების წესის დარღვევისთვის 93 403 ჯარიმა გამოიწერა.

“მაღალი ალბათობით, ამ ჯარიმათა აბსოლუტური უმრავლესობა  უკანონოა“,- აცხადებენ IDFI-ში.

ჯანდაცვის სამსახურების მიერ, ეკონომიკური სუბიექტების მიერ კოვიდ რეგულაციების დარღვევის 181 ფაქტი გამოვლინდა.  დარღვეულ რეგულაციებს შორისაა დახურულ სივრცეში შეკრება, დისტანციის დაუცველობა, საბითუმო/საცალო ვაჭრობა, ღონისძიების ორგანიზება, რესტორნების ფუნქციონირება, კლუბის ფუნქციონირება, შეზღუდული ეკონომიკური საქმიანობა.

ჯანდაცვის სამსახურების მიერ გამოვლენილ სამართალდარღვევათა დაახლოებით 92% სამ ქალაქში გამოვლინდა - თბილისში (69%), ბათუმში (14%) და ქუთაისში (9%).

ინფორმაციისთვის, პანდემიის დროს საქართველოს პარლამენტმა საკანონმდებლო ცვლილებები განახორციელა და რეგულაციების დარღვევაზე ჯარიმები დააწერა.

ბიზნესისთვის დაწესებული რეგულაციების დარღვევისთვის ფიზიკური პირი 2 000 ლარით ჯარიმდება, იურიდიული პირი, 10 000 ლარით. 2 000 ლარიანი ჯარიმაა ღამის საათებში გადაადგილებაზე დაწესებული შეზღუდვების დარღვევაზე. პირბადის ტარების წესის დარღვევა 20 ლარიან ჯარიმას იწვევს, განმეორების შემთხვევაში კი, ჯარიმა ორმაგდება. დახურულ საჯარო სივრცეში პირბადის არმქონე პირის დაშვება იურიდიული პირის/ინდივიდუალური მეწარმის 500 ლარით დაჯარიმებას იწვევს. განმეორების შემთხვევაში ჯარიმა ორმაგდება და 1000 ლარი იქნება.