კახა კალაძე: წლის ბოლოდან თბილისში ყვითელი მიკროავტობუსები აღარ იმოძრავებენ
2021 წლის ბოლოდან დედაქალაქში ყვითელი მიკროავტობუსები აღარ ივლიან.
თბილისის მერის კახა კალაძის განცხადებით, თბილისის სატრანსპორტო კომპანიამ 300 ახალი მიკროავტობუსი უკვე გამოისყიდა. ახლა მას ვალდებულება აქვს, დამატებით 400 მიკროავტობუსი გამოისყიდოს. ჯამში წლის ბოლომდე თბილისისი მოსახლეობას 1000 ახალი მიკროავტობუსი მოემსახურება.
“წლის ბოლოდან ქალაქში არ იმოძრავებს არცერთი ყვითელი, ძველი, გაუბედურებული, დანგრეული მიკროავტობუსი, რომელიც ძალიან დიდ დისკომფორტს წარმოადგენს ადამიანებისთვის. სოციალურ ქსელში უამრავი ვიდეო გვაქვს ნანახი, გამონაბოლქვის თვალსაზრისით როგორ პრობლემას წარმოადგენს გარემოსთვის. შესაბამისად, საზოგადოებრივი ტრანსპორტის როლი ჰაერის დაბინძურებაში, რომელიც ძალიან მაღალი იყო, წლის ბოლოდან ეს პრობლემა მოგვარებული იქნება.
ჩვენი დედაქალაქი იქნება მოწინავე ევროპულ ქვეყნებთან მიმართებაში, საზოგადოებრივი ტრანსპორტის თვალსაზრისით. ყოველთვის გვეყოლება მოწესრიგებული საზოგადოებრივი ტრანსპორტი“,- განაცხადა კახა კალაძემ.
