ღამის კლუბებზე შეზღუდვა შენარჩუნდება - მთავრობა დახმარების შესაძლებლობას განიხილავს
ღამის კლუბებზე შეზღუდვა დიდი ხნის განმავლობაში შენარჩუნდება. თუმცა, მთავრობა მზად არის, კლუბების წარმომადგენლებს შეხვდეს და განიხილოს, დახმარების რა შესაძლებლობა არსებობს.
“პანდემიის პირობებში ზაფხულის ტურისტული სეზონი იმაზე უკეთესი იქნება, ვიდრე ჩვენ ველოდებოდით, მაგრამ ვერ იქნება სრულფასოვანი. შეზღუდვების მინიმალური რაოდენობა რჩება, მათ შორის სამწუხაროდ ეს შეზღუდვა ვრცელდება ღამის კლუბებზე, რადგან ჩვენი ეპიდემიოლოგების მიერ ღამის კლუბები მიჩნეულია ერთ-ერთი რისკის მატარებელ ჯგუფად. თუმცა, ვფიქრობ, მართლაც უნდა განვიხილოთ ღამის კლუბებთან ერთად, დახმარების რა შესაძლებლობები არსებობს, რადგან ეს ინდუსტრია მართლაც დაზარალებულია. როგორც ჩანს, ყველაზე დიდხანს ამ სეგმენტზე გავრცელდება შეზღუდვები. ჩვენი სამინისტრო მზად ვართ, კულტურის სამინისტროსთან, ქალაქის მუნიციპალიტეტთან ერთად, შევხვდეთ, განვიხილოთ, რა შეიძლება გაკეთდეს, რომ დავეხმაროთ. თუ წამოვა ეს ინიციატივა კლუბებიდან, ჩვენ სიამოვნებით მოვისმენთ და აუცილებლად მოვნახავთ გამოსავალს, ისევე როგორც ბევრ სხვა ინდუსტრიასთან მთელი ეს პერიოდი ვნახულობდით გამოსავალს“,- განაცხადა ეკონომიკის მინისტრმა ნათია თურნავამ.
