დეპუტატი: 2022 წელს ისე შევეგებებით, რომ პენსიონერები ადამიანურ პროცენტში აიღებენ სესხს

პენსიონერებისთვის საპროცენტო განაკვეთის შემცირებაზე მუშაობა გრძელდება. 

პლენარულ სხდომაზე ოპოზიციონერმა დეპუტატმა ალექსანდრე ელისაშვილმა განაცხადა, რომ შედეგი რამდენიმე თვეში დადგება და 2022 წლიდან პენსიონერები დაბალი საპროცენტო განაკვეთით ისარგებლებენ.

“ეს არ არის მარტივი ამბავი, რომ ერთ დღეში გადაწყვეტილიყო, მაგრამ ეს არის პროცესი, რომელიც გრძელდება. დაახლოებით 2 კვირის წინ იყო ერთობლივი კომისიის სხდომა, სადაც მთავრობის წარმომადგენლებიც ესწრებოდნენ. იქ შევთანხმდით, რომ ჯანდაცვის სამინისტროს სოციალური სააგენტო წარმოადგენდა პენსიონერთა საბანკო მომსახურების ახალი ტენდერის პირობებს. ჯანდაცვის სამინისტრომ რამდენიმე დღის წინ წარმოადგინა ეს პირობები და ჩვენი პარტია “მოქალაქეები“ ვმუშაობთ ჩვენეულ ხედვაზე და შეთავაზებებზე, რა უნდა ეწეროს ტენდერის პირობებში, რათა ის გამაოგნებელი და გაუგონარი 36% არ იყოს და იყოს გაცილებით ადამიანური.

ალბათ წინა საარჩევნოდ არ და ვერ მოესწრება ტექნიკურად. მე მჯერა და დარწმუნებული ვარ, 2022 წელს არ შევეგებებით ისე, რომ პენსიონერებს გაცილებით ადამიანური საბანკო მომსახურება არ ჰქონდეთ და ადამიანურ პროცენტში არ იღებდნენ სესხს. ამ პროცესს არ მოვეშებით, სადღაც შუა გზაზე არ მიგვიტოვებია და ღრმად მწამს, ეს საქმე ბოლომდე მივა. ჩვენ რა თქმა უნდა ამისთვის ვიბრძოლებთ. თუმცა, პროცესი ნორმალურად მიდის და დიდი საბრძოლველიც არ არის. იმედი მაქვს, შედეგი სულ რამდენიმე თვეში იქნება და ეს შედეგი დააახლოებით 700 000 ჩვენი მოქალაქის, ჩვენი პენსიონერების ცხოვრებას გახდის გაცილებით უკეთესს“,- აღნიშნა ალეკო ელისაშვილმა.