ამირან გამყრელიძე: საქართველოში შემოსულ 400-ზე მეტ ტურისტს კორონა დაუდასტურდა
ბოლო 1 თვის განმავლობაში საქართველოში შემოსულ 400-ზე მეტ ტურისტს კორონავირუსი დაუდასტურდა.
“ტურისტებში 400-ზე მეტი შემთხვევა გვაქვს ქვეყანაში დადასტურებული ინფექციის შემოტანის და შემდეგ მათი იზოლირების. ეს ინფორმაცია საკოორდინაციო საბჭოს მივაწოდეთ. შტამზე ვერ გეტყვით“, - განაცხადა დაავადებათა კონტროლის ეროვნული ცენტრის ხელმძღვანელმა ამირან გამყრელიძემ.
ინფორმაციისთვის, მოქმედი დადგენილებით, საერთაშორისო საჰაერო მიმოსვლის შემთხვევაში, უცხო ქვეყნიდან ჩამოსული ნებისმიერი პირი, მოქალაქეობის მიუხედავად, ნებისმიერი ტიპის კოვიდვაქცინის სრული კურსის დამადასტურებელი დოკუმენტის საზღვარზე წარდგენის შემთხვევაში არ ექვემდებარება განსაზღვრულ შეზღუდვებს - ტესტირებას, იზოლაციას. (გამონაკლისია ინდოეთიდან შემოსული პირი).
რაც შეეხება სახმელეთო და საზღვაო გზით შემოსვლის წესს, ნებისმიერი ტიპის კოვიდვაქცინის სრული კურსის დამადასტურებელი დოკუმენტის წარდგენასთან ერთად, სავალდებულოა საქართველოში ვიზიტამდე ბოლო 72 საათში ჩატარებული PCR ტესტის ნეგატიული პასუხის წარდგენა.
