ამირან გამყრელიძე ივნისში შეზღუდვების შემსუბუქებას ვარაუდობს
დაავადებათა კონტროლის ეროვნული ცენტრის ხელმძღვანელის ამირან გამყრელიძის განცხადებით, ქვეყანა კორონავირუსის გავრცელების პიკურ პერიოდშია. შესაბამისად, მნიშვნელოვანია დაწესებული რეგულაციების და რეკომენდაციების დაცვა.
მისი თქმით, მაისში თუ შემთხვევების მნიშვნელოვანი მატება არ იქნება, ივნისში შეზღუდვები შემსუბუქდება.
“ახლა ვართ პიკურ პერიოდში და ძალიან მნიშვნელოვანია, როგორ დავიცავთ ყველა იმ რეკომენდაციას და რეგულაციას, რაც ამჟამად არსებობს. განსაკუთრებით მნიშვნელოვანია პირბადის ტარება. ამ ეტაპზე პირბადის ტარების მაჩვენებელი 76%-ია, მაგრამ მინდა ეს იყოს 90%-95%, მაშინ შედარებით სწრაფად დავძლევთ ამ პიკსაც. მნიშვნელოვანია შემდეგი წესების დაცვა - პირბადე, დისტანცია, დიდი თავშეყრების თავის არიდება, სანიტარული წესების დაცვა და უფრო აქტიური იმუნიზაცია. თუ ამ ყველაფერს დავიცავთ, იმედი გვაქვს, რომ მაისს დაახლოებით ამ პარამეტრებით გავივლით, რაც ახლა გვაქვს და ივნსში ბევრად უკეთესი ინდიკატორებით შევალთ, რაც დაწესებული შეზღუდვების შემსუბუქების საფუძველი გახდება“, - აღნიშნა ამირან გამყრელიძემ.
