ამირან გამყრელიძე: ძალიან თუ არ "გავლაღდებით", ვირუსი 2 კვირაში უკუსვლას დაიწყებს

დაავადებათა კონტროლის ეროვნული ცენტრის ხელმძღვანელის ამირან გამყრელიძის განცხადებით, კორონავირუსის გავრცელებით ქვეყანა ახლა პიკურ პერიოდშია.

“ყოველთვის ვიძახდით, რომ აპრილის ბოლო, მაისის პირველი ორი კვირა და ცოტა მეტი პიკური პერიოდი უნდა ყოფილიყო, შემდეგ დაიწყება დაღმასვლა. ეს ეპიდემიის ბუნებივი მრუდიც არის“,- აღნიშნა ამირან გამყრელიძემ.

მისი თქმით, ქვეყანაში პირბადის გამოყენების მაჩვენებელი 76%-მდე გაიზარდა, თუმცა იდეალური მაჩვენებელი 95% იქნებოდა.

“კარგია, სითბოს მიუხედავად ადამიანები იყენებენ პირბადეს, რომელიც დაცვის ერთ-ერთი ყველაზე კარგი საშუალებაა“, - დასძენს ამირან გამყრელიძემ.

ამირან გამყრელიძის განცხადებით, არსებული შეზღუდვების შემსუბუქებაზე საუბარი ჯერ-ჯერობით არ არის, თუმცა არც დამატებითი შეზღუდვები დაწესდება.

“მედიცინაში პროგნოზირებისგან თავს ყოველთვის ვიკავებთ, მაგრამ გარკვეული პარამეტრებით მაინც ვფიქრობთ, რომ პიკში ვართ. ყველაფერს თუ დავიცავთ, ძალიან არ “გავლაღდებით“, ალბათ ამ 2 კვირის ფარგლებში ინფექცია თანდათან უკუსვლას დაიწყებს“, - აცხადებს ამირან გამყრელიძე.

მისი თქმით, მნიშვნელოვანია ვაქცინაციის ტემპის მომატება.

როგორც მან აღნიშნა, ბოლო 24 საათში 4 689 ადამიანი აიცრა, ეს ყველაზე მაღალი ციფრია, თუმცა საკმარისი არ არის. მაისში დღეში 6 000 ადამიანი მაინც უნდა აიცრას, ივნისში კი, ეს ციფრი 7 000- 8 000-ზე უნდა ავიდეს ყოველდღიურად.