ამირან გამყრელიძე: ჩვენ დანის პირზე გავდივართ

დაავადებათა კონტროლის ეროვნული ცენტრის ხელმძღვანელის ამირან გამყრელიძის განცხადებით, ქვეყანა “დანის პირზე გადის“ - ეკონომიკას მიეცა თავისუფლება, მეორეს მხრივ აუცილებელია რეკომენდაციების დაცვა.

მისი თქმით, საქართველოში დელტა შტამის შემთხვევების რაოდენობა გაიზარდა. გუშინ 7 ახალი შემთხვევა დადასტურდა.

“სხვადასხვა პროგნოზირების მაჩვენებლებით, საქართველოში 10%-დან 20%-მდე დელტა შტამი ცირკულირებს. ეს პროგოზირებადი იყო. დელტა შტამი თანდათან ბრიტანეთში და ევროპის რიგ ქვეყნებში ანაცვლებს ე.წ. ბრიტანულ შტამს და მისი გავრცელება ინტენსიური ხდება. დღევანდელი მონაცემით 85 ქვეყანაში არის ის უკვე დაფიქსირებული. მეტი სიფრთხილე გვმართებს.

ჩვენ ოქროს შუალედით მივდივართ, დანის პირზე გავდივართ.  ერთის მხრივ ზაფხულია, ეკონომიკა მეტად იხსნება, აუცილებელია მეტი თავისუფლება მიეცეს ეკონომიკას, მაგრამ მეორეს მხრივ აუცილებელია ყველა რეგულაციის და რეკომენდაციის დაცვა, რომ ეპიდსიტუაცია არ გაუარესდეს“, - აღნიშნა ამირან გამყრელიძემ .

მისი შეფასებით, ივნისში საქართველოში კორონავირუსის ახალი შემთხვევების რაოდენობა თანაბარი იყო - არ იზრდებოდა და არც მცირდებოდა.

რაც შეეხება მოსალოდნელია თუ არა რეგულაციების განახლება ქვეყანაში, საკოორდინაციო საბჭო ეპიდსიტუაციის მიხედვით იმჯსელებს.

“ისრაელში, სადაც მოსახლეობის 60% ორჯერადად არის აცრილი, ახალი შემთხვევების ზრდა ძირითადად დელტა შტამის ხარჯზეა. დახურულ სივრცეში პირბადის გამოყენება აღადგინა, ფიქრობს გარე სივრცეებზეც, ეპიდსიტუაცია თუ რაღაც ნიშნულზე მივა. ბრიტანეთშიც გადაიდო რეგულაციების შემსუბუქება“, - აღნიშნა ამირან გამყრელიძემ.