საზოგადოება
26/01/2021
აჭარის გარდა, რეგიონებში დადებითობის მაჩვენებელი 5%-დან 8%-მდეა - ტიკარაძე
ჯანდაცვის მინისტრის ეკატერინე ტიკარაძის განცხადებით, საქართველოში ცვალებადი ეპიდემიოლოგიური მაჩვენებელია. აჭარაში დადებითობის მაჩვენებელი 4%-ზე ნაკლებია, დანარჩენ რეგიონებში კი, ეს მაჩვენებელი 5%-დან 8%-მდე მერყეობს.
„4%-იანი დადებითობის მაჩვენებელი, ეს ერთ-ერთი მთავარი ინდიკატორია,რომელსაც ჩვენ ვაქცევთ ყურადღებას და გვაძლევს იმის გარანტიას, რომ იქნება შენარჩუნებული სტაბილურობა. 4%-იან მაჩვენებელს აქვს დიდი მნიშვნელობა, თუმცა, ამავდროულად მნიშვნელოვანია, გათვალისწინებული იყოს კონკრეტულ რეგიონში იმ პერიოდისთვის ინფექციის გავრცელების კოეფიციენტი. ამ ინციდენტობას ვაკვირდებით როგორც 7 დღიან, ასევე 14 დღიან ჭრილში, ვინაიდან 7 დღიან ჭრილში არ ნიშნავს, რომ დადებითი დინამიკა შენარჩუნებული და სტაბილურია.
აქედან გამომდინარე ვუყურებთ ამას 14 დღიან ჭრილში. ამის შემდეგ ვიღებთ გადაწყვეტილებებს, გარკვეულ ქმედებებზე“,- აღნიშნა ჯანდაცვის მინისტრმა ბრიფინგზე.
მისი თქმით, საკოორდინაციო საბჭოს დღევანდელ სხდომაზე შეზღუდვების შემსუბუქების ჩამონათვალი არ გაზრდილა.
„სამომავლოდ, იქიდან გამომდინარე, რომ ქვეყანაში დადებითი დინამიკა გრძელდება, დავამატებთ რეგიონებს და გავაფართოვებთ ჩამონათვალს, რომელსაც ჩვენი მოქალაქეები და ეკონომიკა ასე ელოდება“,- განაცხადა ეკატერინე ტიკარაძემ.
შეგახსენებთ, საკოორდინაციო საბჭოს დღევანდელ სხდომაზე პრემიერ-მინისტრმა განაცხადა, რომ თუ თბილისში დადებითობის მაჩვენებელი 4%-ს ჩამოცდება, მუნიციპალური ტრანსპორტი ამუშავდება. აგრეთვე ამოქმედდება სასწავლო დაწესებულებები.
