TikTok-ი 18 წლამდე ახალგაზრდებს ლიმიტს უწესებს
პოპულარული სოციალური ქსელი TikTok-ი ახალგაზრდებისთვის ლიმიტს აწესებს. BBC-ის ინფორმაციით, შეზღუდვა 18 წლამდე ასაკის მომხმარებლებს შეეხებათ და მათ აპლიკაციის გამოყენებისთვის დღეში 60-წუთიანი ლიმიტი ექნებათ. ლიმიტის ამოწურვის შემთხვევაში კი, აპლიკაციით სარგებლობის გასაგრძელებლად ახალგაზრდებს პაროლის შეყვანა მოუწევთ.
როგორც BBC წერს, TikTok-ის ახალი წესი ძალაში რამდენიმე კვირაში შევა და მასზე უარის თქმა შესაძლებელი იქნება. თუმცა, იმ შემთხვევაში, თუ მომხმარებელი აპლიკაციას დღეში სულ მცირე 100 წუთი გამოიყენებს, TikTok-სგან მიიღებს მოთხოვნას, რომ საკუთარი ეკრანის დროის კონტროლი გამოიყენოს.
BBC-ის ცნობითვე, TikTok-ის ახალი ფუნქციის მიზანია, ადამიანებს აპლიკაციის გამოყენების კონტროლში დაეხმაროს. მათ შორის, როგორც ახალგაზრდებს, ისე მათ მშობლებს.
BBC-ი ციფრული სიძულვილის წინააღმდეგ ბრძოლის ცენტრის აღმასრულებელი დირექტორის იმრან აჰმედის კომენტარსაც აქვეყნებს, რომელიც იმ ნეგატიურ გავლენებზე საუბრობს, რაც TikTok-ს მოზარდებზე აქვს.
იმრან აჰმედი ამბობს, რომ TikTok-ის ალგორითმი „ბომბავს“ მოზარდებს მავნე შინაარსის ინფორმაციით. „ის არის ყველაზე ნარკოტიკული, ყველაზე საშიში და ყველაზე სასწრაფოდ გადასაკეთებელი", - ამბობს იმრან აჰმედი BBC-ისთან ინტერვიუში. მას ციფრული სიძულვილის წინააღმდეგ ბრძოლის ცენტრის მიერ ჩატარებული კონკრეტული კვლევის შედეგიც მოჰყავს და აღნიშნავს, რომ TikTok-ის ანგარიშის გახსნიდან რამდენიმე წუთში, 13 წლის გოგონას ე.წ „ფორ იუ ფეიჯზე“ ისეთი ნეგატიური ვიდეო-კონტენტი გამოუჩნდა, როგორიცაა - მაგალითად თვითდაზიანება.
იმრან აჰმედმა მოუწოდა პლატფორმას თავისი ძალისხმევა არა მხოლოდ ეკრანთან გატარებული დროის შეზღუდვაზე, არამედ მავნე კონტენტის არხების გასუფთავებაზე მიმართოს, რათა TikTok „ბავშვებისთვის უსაფრთხო გარემოდ“ აქციოს.
ცნობისთვის, TikTok-ის აქტიური მომხმარებლები ყოველთვიური მაჩვენებელი ერთ მილიარდს აჭარბებს, რაც მას მსოფლიოში ერთ-ერთ უდიდეს სოციალურ ქსელად აქცევს.
