რუსეთში წლიური ინფლაცია 14.5%-ია

უკრაინაში ომის დაწყების ფონზე რუსეთში საარსებო მინიმუმი 14%-ით გაიზარდა.

აგრესორი ქვეყნის მოქმედებების პარალელურად, ქვეყანაში მზარდია ინფლაციის მაჩვენებელიც. გაუფასურებას განაგრძობს რუბლიც. მისი ღირებულება მიმდინარე წელს დოლართან მიმართებით უკვე 22%-ით გაუფასურდა. ამის შესახებ BBC წერს. 

საერთაშორისო გამოცემა რუსეთის ეკონომიკის მინისტრზე დაყრდნობით წერს, რომ ბოლო მონაცემებით, ქვეყანაში წლიური ინფლაცია 14.5%-ია, რაც 2015 წლის შემდეგ რეკორდული მაჩვენებელია. 

საერთაშორისო გამოცემა ფედერალური სახელმწიფო სტატისტიკის სამსახურის განცხადებასაც ციტირებს, რომლის მიხედვით, შაქრის ღირებულება მთელი ქვეყნის მასშტაბით, საშუალოდ 14%-ით გაიზარდა, ხოლო გარკვეულ რეგიონებში მატებამ 37.1%-იც შეადგინა. ინფლაციის ზრდის ერთ-ერთი მთავარი განმაპირობებელი სწორედ ეს პროდუქტი აღმოჩნდა. 

სამომხმარებლო კალათაში გაძვირდა ბოსტნეულიც. მაგალითად, ხახვის ღორებულებამ მთელი ქვეყნის მასშტაბით საშუალოდ 13.7%-ით მოიმატა, ზოგ რეგიონში კი 40.4%-ით. 4%-ით გაძვირდა შავი ჩაი, ხოლო ტუალეტის ქაღალდის ფასმა 3%-ით მოიმატა.