მსოფლიო
22/02/2022
გერმანიის მთავრობა "ჩრდილოეთის ნაკადი 2"-ის სერთიფიცირებას აჩერებს
რუსეთ-უკრაინის კონფლიქტის ესკალაციის ფონზე, გერმანიის მთავრობა აჩერებს Nord Stream 2 ბუნებრივი გაზსადენის სერტიფიცირების პროცესს. ამის შესახებ კანცლერმა ოლაფ შოლცმა განაცხადა.
გერმანიის ხელისუფლება აღმოსავლეთ უკრაინაში ესკალაციის შედეგად აუცილებელ ქმედებებს ახორციელებს.
როგორც SPIEGEL-ი სამთავრობო წყაროზე დაყრდნობით წერს, ეკონომიკის ფედერალურმა სამინისტრომ შეაჩერა საკამათო Nord Stream 2 ბუნებრივი აირის მილსადენის დამტკიცების პროცესი. სამშაბათს დილით მინისტრმა რობერტ ჰაბეკმა ქსელის ფედერალურ სააგენტოს წერილობით დაავალა, თავდაპირველი დადებითი სერტიფიკატი, რომელიც გადამწყვეტია მილსადენის სერტიფიცირებისთვის, საქმიდან გამოითხოვოს.
მოწმობა (სერტიფიკატი), რომელიც წინა მთავრობამ ოქტომბრის ბოლოს გასცა, ეხება გერმანიის ბუნებრივი აირით მომარაგების უსაფრთხოებას, რაც, იმჟამინდელი მოსაზრებით, Nord Stream 2-ის ექსპლუატაციაში გაშვებით საფრთხე არ მიადგებოდა.
წერილის მიხედვით, გეოსტრატეგიული სიტუაციის გადაფასების შედეგად და აღმოსავლეთ უკრაინაში ესკალაციის გათვალისწინებით, ეს ასე აღარ არის. „ამ მოწმობის გარეშე გაზსადენის სერტიფიცირება შეუძლებელია“, - აცხადებენ სამინისტროს წრეებში.
