ევროპა რუსულ ნავთობზე ემბარგოს დაწესებას განიხილავს
ევროპა, ამერიკის შეერთებული შტატების მსგავსად, რუსულ ნავთობზე ემბარგოს დაწესებას განიხილავს.
CNN-ის ინფორმაციით, საკითხი დამატებით შესაძლოა მიმდინარე კვირაში კიდევ ერთხელ დადგეს დღის წესრიგში, რადგან ხუთშაბათს ევროპას ევროკავშირის, ნატოსა და დიდი შვიდეულის სამიტებისთვის ამერიკის პრეზიდენტი, ჯო ბაიდენი ეწვევა.
ამერიკული გამოცემა ევროკავშირის საგარეო პოლიტიკის ხელმძღვანელის, ჯოზეფ ბორელის სიტყვებს ციტირებს, რომლის თანახმად, რუსეთისთვის დამატებითი სანქციების დაწესების შესახებ გაერთიანებაში აქტიურად მსჯელობენ.
"დღეს ამ საკითხთან დაკავშირებით გადაწყვეტილება არ მიგვიღია, თუმცა მინისტრების მხრიდან ამ და დამატებითი შეზღუდვების დაწესებაზე მსჯელობა აქტიურად მიმდინარეობს. იყო საინტერესო აზრთა გაცვლა და ინფორმაციების გაზიარება",- წერს CNN ბორელის მიერ ჟურნალისტებისთვის მიცემული განცხადების შესახებ.
