თამარ გაბუნია: ჩვენი მიზანია, რეგულირების სააგენტოს ოპერატიული რეაგირების შესაძლებლობა ჰქონდეს
„ჩვენი მიზანია რეგულირების სააგენტოს ოპერატიული რეაგირების შესაძლებლობა ჰქონდეს,“-ამის შესახებ გადაცემა "ბიზნესი რუსთავი 2"-თან ჯანდაცვის მინისტრის მოადგილე, თამარ გაბუნიამ განაცხადა.
მისი თქმით, საჭიროა შეტყობინების გარეშე ინსპექტირება, რაც საზღვარგარეთ აპრობირებული მეთოდია. ვინაიდან, როდესაც რეგულირების სააგენტოში პაციენტის საჩივარი შედის, სააგენტო სასამართლოს მიმართავს, რომელიც 72 საათში აკმაყოფილებს მოთხოვნას.
თუმცა გასათვალისწინებელი ფაქტია, რომ ამის პარალელურად სასამართლოდან კლინიკას ეგზავნება შეტყობინება და შესაბამისად კლინიკა ემზადება შემოწმებისთვის, რაც გაბუნიას განმარტებით, არაზუსტ სურათს ქმნის.
„ზოგიერთი კლინიკა, სასამართლოს გადაწყვეტილებას ასაჩივრებს და ინსპექტირებას დროში აჭიანურებს. ეს რა თქმა უნდა ეჭვს ბადებს, რომ კლინიკა ცდილობს ინსპექტირების პროცესი რაც შეიძლება გადაავადოს.“ -აცხადებს გაბუნია.
ჯანდაცვის მინისტრის მოადგილის ინფორმაციით,ასევე ცვლილებებია ლიცენზიებისა და ნებართვის შეჩერების საკითხზეც. დღეისათვის ლიცენზია და ნებართვა გარკვეული პერიოდისა და ეტაპების გავლის შემდეგ შეიძლება გაუქმდეს.
"მაგალითად, თუ კლინიკა გადაცდომისთვის სამჯერ დაჯარიმდა, უკვე დგება საკითხი, რომ საერთოდ ჩამოერთვას როგორც ლიცენზია, ასევე ნებართვა.
ამ სამი დაჯარიმების განმავლობაში კლინიკა კვლავ ფუნქციონირებს, რაც პაციენტისთვის სარისკოა და საჭიროა აღნიშნულ პროცესში ცვლილების შეტანა,"-აცხადებს გაბუნია.
