რას შეცვლის წამლის ლაბორატორიის გახსნა ფარმაცევტულ ბაზარზე
ქვეყანას ახლო მომავალში წამლის ხარისხის კონტროლის პირველი ეროვნული ლაბორატორია ექნება. ჯანდაცვის მინისტრის ზურაბ აზარაშვილის თმით, ლაბორატორია უკვე მზადაა და მხოლოდ მისი გახსნის თარიღია შესათანხმებელი.
ფარმაცევტული კომპანიების წარმომადგენელთა ასოციაციის დირექტორის ირაკლი მარგველაშვილის თქმით, აღნიშნული სიახლე მისასალმებელია, თუმცა არა გადამწყვეტი, რადგან მთავარია რეგულაციები იყოს ჰარმონიზებული საერთაშორისო სტანდარტებთან.
„ლაბორატორიაში ფიზიკურად ხდება მედიკამენტების შემოწმება, ყველა წამლის ხარისხის კონტროლი არცაა მიზანი. მედიკამენტების ცალკე პარტია ცალკე მოწმდება. კარგია, რომ ლაბორატორიაში მოკლე ვადებში მოხდება მედიკამენტის შემოწმება, მაგრამ მთლიანობაში რომ შეიცვალოს სურათი და კონტროლი გავაუმჯობესოთ, გვჭირდება კანონი ფარმაცევტული საქმიანობის შესახებ, რომელიც საერთაშორისო სტანდარტებთან იქნება შესაბამისობაში,“ – განაცხადა მარგველაშვილმა.
მისივე თქმით, შარშანდელთან შედარებით მედიკამენტების ბაზრის შემოწმება გაორმაგებულია, მათ შორის ხარისხის და პროდუქციის არაკანონიერი მიმოქცევის კუთხით, თუმცა მისი თქმით ეს არაა საკმარისი.
ირაკლი მარგველაშვილის განცხადებით, ბოლო წლებში განსაკუთრებით აქტუალური გახდა გამარტივებული იმპორტის საკითხი და თურქეთის ბაზარი გაიხსნა, თუმცა ამ პროცესის პოზიტიურ შედეგს, რაც ფასის დაწევაში გამოიხატა, მოჰყვა გარკვეული რისკებიც.
კერძოდ, მედიკამენტების პარტიები გასამმაგდა და შესაბამისად, მეტი რაოდენობის წამლის შემოწმება იქნება საჭირო.
