"თუ მოხდება ზარალის რეგულირების ხარჯების შემცირება, პოლისების ფასებიც შემცირდება"

სადაზღვევო სექტორი ტრანზიტულ პერიოდშია და შემოდგომის შუა რიცხვებამდე ინფლაციის მაჩვენებელს დააკვირდება. როგორც სექტორის წარმომადგენლები აცხადებენ, თუ მოხდება ზარალის რეგულირების ხარჯების შემცირება, პოლისების ფასებიც შემცირდება. 

“ბბ დაზღვევის” გენერალური დირექტორი კოტე სულამანიძე  "ბიზნესპარტნიორთან" აღნიშნავს,  სექტორში  მომხმარებლის მხრიდან, ფასების კორექტირებაზე მოთხოვნა არსებობს, თუმცა საჭიროა ინფლაციის დეტალური ანალიზი.

„მართალია, გარკვეულ პროდუქციაზე ფასები მცირდება, თუმცა ადამიანური სერვისები სადაც არის ჩართული, იქ ფასების კლება ნაკლებად ფიქსირდება.

აქედან გამომდინარე,  რთული იქნება დღევანდელი მოცემულობით, ფასების რადიკალურ  შემცირებაზე საუბარი. რაც შეეხება მიმართულებას, სადაც პოლისებზე ფასის კორექტირება უფრო მეტად არის შესაძლებელი, ეს ავტოდაზღვევაა.  ბოლო პერიოდის ინფლაციის ანალიზიდან ჩანს, რომ მანქანის ღირებულება 3 პროცენტით შემცირდა, ნაწილების კუთხით კი, არის ტენდენცია რომ მათი ფასები 13 პროცენტამდე შემცირდეს. თუმცა, მომსახურების ფასები ამ სექტორში ისევ მაღალია“, - აცხადებს  კოტე სულამანიძე.

მისივე განმარტებით, ავტოდაზღვევის ფასების კორექტირებაზე დადებითი გავლენა ექნება ავტომფლობელთა მესამე პირის პასუხისმგებლობის დაზღვევასაც, რომელიც, სავარაუდოდ, სავალდებულო მომავალი წლიდან გახდება.

„ამ ფაქტორებიდან გამომდინარე, ავტოდაზღვევას ყველაზე მეტი თეორიული შანსი აქვს, რომ პოლისების ფასები შემცირდეს, თუმცა შემოდგომამდე დავაკვირდებით ინფლაციის ტრენდს, რა სერვისი, თუ პროდუქტები გაიაფდება და რა - არა“, - აღნიშნავს  სულამანიძე.

აღსანიშნავია, რომ მაისში ქვეყანაში ინფლაციის მაჩვენებელი შემცირდა. კერძოდ, წინა თვესთან შედარებით ინფლაციის დონემ -0.1% შეადგინა. რაც შეეხება წლიურ ჭრილს, საქსტატის მონაცემებით, ინფლაციის დონე 1.5%-ია.