ციფრული ბანკისთვის ნაკლები რეგულაციები და მინიმალური კაპიტალი ₾5 მლნ მოითხოვება
ეროვნული ბანკი საქართველოში ციფრული ბანკის ლიცენზირების საკითხს განიხილავს. ამ მოდელის განვითარებით ცენტრალური ბანკი მიზნად ისახავს ხელი შეუწყოს ინოვაციური ბიზნესს მოდელების განვითარებას, ფინანსური პროდუქტების მრავალფეროვნებას, ასევე მომხმარებლის გარშემო არსებულ ტექნოლოგიურ ინფრასტრუქტურაზე მორგებულ, მოხერხებულ, სწრაფი და ხელმისაწვდომი ციფრული ფინანსური ეკოსისტემის განვითარებას. რისკების მინიმიზაციის მიზნით ეროვნული ბანკი პროცესში რეგულირების ლაბორატორიას გამოიყენებს.
ციფრული ბანკის პოტენციალზე საქართველოს ბანკების ასოციაციის პრეზიდენტმა გადაცემაში "ბიზნესპარტნიორის ოთხეული" ისაუბრა.
ალექსანდრე ძნელაძემ განაცხადა, რომ ციფრული ბანკის პოტენციალი არ არის მხოლოდ საქართველო, მისი პოტენციალია საერთაშორისო მასშტაბით გასვლა და საერთაშორისო სერვისის შეთავაზება.
მისი თქმით, ციფრული ბანკის შემთხვევაში მინიმალური კაპიტალის მოთხოვნა კლასიკური ბანკისგან განსხვავებით 10-ჯერ ნაკლებია და მხოლოდ 5 მლნ ლარს შეადგენს, ნაკლებია რეგულაცია, არ არის რთული გაანგარიშება და არის მიბმული პირდაპირ მიმდინარე ანგარიშებზე მოზიდული სახსრების ლიკვიდობის კოეფიციენტთან.
ალექსანდრე ძნელაძემ მაგალითად მოიყვანა, საქართველოში არსებული ერთადერთი ციფრული ბანკი „სფეისი“, რომელმაც უკვე შეძლო ქვეყნის ფარგლებს გარეთ გასვლა.
რაც შეეხება იმას, რომ ციფრულმა ბანკმა შესაძლოა კონკურენცია გაზარდოს ბანკებისთვის, ალექსანდრე ძნელაძე განმარტავს, რომ კონკურენცია არასოდეს არის ცუდი და აღნიშნა, რომ საბანკო სექტორში ისედაც ძლიერიკონკუკრენციაა.
