სასკოლო განათლების ხარისხი უნდა ამაღლდეს - არჩილ გაჩეჩილაძე
„საქართველოს ბანკის“ გენერალური დირექტორი არჩილ გაჩეჩილაძე ქვეყანაში განათლების ხარისხის გაუმჯობესების მნიშვნელობაზე საუბრობს. როგორც მან გადაცემაში „ბიზნესპარტნიორის ოთხეული“ განაცხადა, საჭიროა გაიზარდოს განათლების ხარისხი და პირველ რიგში ეს სასკოლო განათლების დონეზე უნდა მოხდეს.
გაჩეჩილაძე აღნიშნავს, რომ ამ მიმართულებით სერიოზული გამოწვევებია.
„ამასთან ერთად, არსებობს რაღაცები, რაც შეიძლება გააკეთო სულ რამდენიმე წლის განმავლობაში. ბანკები დღეს ბევრად უფრო ტექნოლოგიური კომპანიები არიან, ვიდრე გარედან ჩანს.
თუ სადმე მატებაა დასაქმებული ადამიანების, ესენი ძირითადად არიან პროგრამისტები, სხვადასხვა ტიპის ციფრული სპეციალისტები და ა.შ. ეს ყველაფერი არის თანამედროვე ეკონომიკის მახასიათებლები. ამასთან ერთად, ჩვენ ვერ გამოვიწვევთ თანამედროვე ეკონომიკის ტექბუმს თუ ეკოსისტემა არ შეიქმნა, თუ ბევრი სხვადასხვა კომპანია არ შეიქმნა,რომელიც სხვადასხვა სფეროში ასეთ შეთავაზებებს შექმნის. ამიტომ დავიწყეთ იმაზე ფიქრი, რომ რა შეგვიძლია გავაკეთოთ. დავინახეთ, რომ ამისთვის მარტო კარგი პროგრამისტობა არ კმარა, ასევე არ კმარა კარგი დიზაინერობა, საჭიროა, რომ არსებობდეს ვიღაც, რომელიც ასეთი ტიპის ბიზნესებს ეტყვის იმას, თუ რა უნდა გააკეთოს იმისთვის, რომ სწრაფად გაიზარდოს. ამაში ყველაზე მაგრები არიან კალიფორნიელები, აქსელერატორები. GIT-ასთან ერთად პარტნიორობით ჩამოვიყვანეთ ეს ხალხი. ეს არის ენერგია, ცოდნა, ყველაზე კარგი ადგილიდან“-აცხადებს გაჩეჩილაძე.
მისივე განცხადებით, დღეს საქართველოს ბანკის პორტფელში სტარტაპებს 0.1%-ი უჭირავს.
