მსოფლიო დონის მომღერლების საქართველოში ჩამოსაყვანად კულტურის სამინისტროს ბიუჯეტი 70 მლნ ლარით იზრდება
2022 წელს კულტურის, სპორტისა და ახალგაზრდობის სამინისტროს დაფინანსება 70 მლნ ლარით გაიზრდება და 470 მლნ ლარით განისაზღვრება. ბიუჯეტის პროექტი პარლამენტშია ინიცირებული.
როგორც განმარტებით ბარათში წერია, ასიგნებების ზრდა დაკავშირებულია ტურიზმის ხელშეწყობის კუთხით მსოფლიოში აღიარებული მუსიკალური ჯგუფებისა და მომღერლების კონცერტების ხარჯების დაფინანსებით.
აღნიშნული ღონისძიებები გაიმართება 2023-2024 წლების ტურისტულ სეზონებზე, თუმცა აღსანიშნავია, რომ მსოფლიოში მსგავსი ღონისძიებები იგეგმება 1-1,5 წლით ადრე, ვინაიდან მსოფლიო დონის ვარსკვლავური ჯგუფები და მომღერლები, მათ საგასტროლო ტურნეებს მინიმუმ 1 წლით ადრე გეგმავენ. ასევე, წინასწარ არის საჭირო შესაბამისი აპარატურის შეძენა და მისი საქართველოში ტრანსპორტირება.
"აღნიშნულის გათვალისწინებით, სამინისტროს მიმდინარე წელს გამოეყოფა საჭირო თანხის დიდი ნაწილი, რომლის ფარგლებშიც განხორციელდება როგორც ჰონორარების ანაზღაურება, ასევე შესაბამისი ტექნიკისა და აპარატურის შესყიდვა. ღონისძიებების სრულად დაფინანსებისთვის საჭირო თანხების მობილიზება განხორციელდება ზემოაღნიშნული ღონისძიებების ბილეთების რეალიზაციისა და სპონსორებისგან მიღებული შემოსავლებით. შესაბამისად, არ იქნება საჭირო 2023-2024 წლებში დამატებითი თანხების გამოყოფა", - წერია განმარტებით ბარათში.
