ლონდონის საფონდო ბირჟიდან GHG-ის დელისტინგი ტაქტიკური სვლაა - ნიკოლოზ გამყრელიძე

„საქართველოს ჯანდაცვის ჯგუფის“ გენერალური დირექტორი „ბიზნესპარტნიორთან“ ლონდონის საფონდო ბირჟიდან დელისტინგის მიზეზებს განმარტავს.

ნიკოლოზ გამყრელიძის განცხადებით, ეს კომპანიის მხრიდან ტაქტიკური სვლა იყო. „ეს იყო უფრო ტაქტიკური გადაწყვეტილება იმიტომ, რომ გლობალურად მაკროეკონომიკური ცვლილებების გამო ორივე კომპანია - საქართველოს ჯანდაცვის ჯგუფი და საქართველოს კაპიტალი დაპატარავდა და შესაბამისად, საქართველოს ჯანდაცვის ჯგუფი თვითონაც ნაკლებად ლიკვიდური იყო.

გადავწყვიტეთ, რომ ორი კომპანიიდან ერთი უფრო დიდი და ლიკვიდური შეგვექმნა. ამ ფაქტს აქციონერებიც დადებითად შეხვდნენ იქიდან გამომდინარე, რომ 97%-მა ამ გადაწყვეტილებას მხარი დაუჭირა. საფონდო ბირჟა კაპიტალთან შედარებით მარტივი წვდომის საშუალებას გვაძლევს. ეს საშუალება კვლავ რჩება საქართველოს კაპიტალის ფარგლებში . ეს იქნება უფრო მსხვილი კომპანია, რომელსაც ინვესტორები სიდიდიდან გამომდინარე უფრო აქტიურად შეხედავენ და მასში ფულსაც აქტიურად ჩადებენ“,- განმარტა გამყრელიძემ.

შეგახსენებთ, რომ ევექსის, სადაზღვევო კომპანია იმედი ელისა და ფარმაცევტული ქსელების მფლობელმა  „საქართველოს ჯანდაცვის ჯგუფმა" ლონდონის საფონდო ბირჟა დატოვა.  კომპანიის დელისტინგი გასულ კვირას შევიდა ძალაში.  ჯგუფის 100% მისმა მაჟორიტარმა აქციონერმა "ჯორჯია ქეფითალმა"  გამოისყიდა სპეციალური შეთავაზებით, კერძოდ ჯანდაცვის ჯგუფის  აქციონერებმა ყოველი 5 აქციის სანაცვლოდ "ჯორჯია ქეფითალის" 1 აქცია მიიღეს.  კომპანია „ლონდონის საფონდო ბირჟაზე“ პრემიუმ კატეგორიაში 2015 წელს დაილისტა და ინვესტორებისგან 100 მილიონი დოლარიც მოიზიდა.