ინფლაციასთან ბრძოლის რა ინსტრუმენტები აქვს სებ-ს - კობა გვენეტაძის განმარტება

არსებულ მაღალ ინფლაციას ეროვნული ბანკის პრეზიდენტი ერთჯერად ფაქტორებს უკავშირებს. 

კობა გვენეტაძემ მონეტარული პოლიტიკის სხდომის შემდეგ “ბიზნესპარტნიორის” კითხვას უპასუხა, რომელიც სწორედ ინფლაციასთან ბრძოლის ინსტურმენტებს ეხებოდა.

მისი თქმით, ეროვნული ბანკის მთავარი ინსტრუმენტი მონეტარული პოლიტიკის განაკვეთია.

“ამავე დროს, საკმაოდ ბევრი ინტერვენცია განვახორციელეთ, გასულ წელს 616 მლნ გავყიდეთ და წელს დაახლოებით 350 მლნ. ეს ინტერვენციები მიზნად ისახავდა სავალურო ბაზრის გაუმართავი მუშაობის თავიდან აცილებას და პანდემიის შედეგად ბაზრისთვის უცხოური ვალუტის დანაკლისის ნაწილობრივ შევსებას.

არსებული პროგნოზით, ინფლაციაში ერთჯერადი ფაქტორების ამოწურვის კვალდაკვალ, ინფლაცია თავის მიზნობრივ მაჩვენებელს დაუბრუნდება,” - განაცხადა ეროვნული ბანკის პრეზიდენტმა.

საქართველოს ეროვნული ბანკი ბოლო პერიოდის მაღალ ინფლაციას ერთ-ერთ ძირითად გამოწვევად მიიჩნევს. შეგახსენებთ, რომ ნოემბერში ინფლაციის ტემპმა მცირედ, უკან დახევა დაიწყო. წლიურმა მაჩვენებელმა 12.5% შეადგინა, ოქტომბერში კი ის 12.8%-ით განისაზღვრებოდა. როგორც მოსალოდნელი იყო, მონეტარული პოლიტიკის კომიტეტმა დღეს რეფინანსირების განაკვეთი 10-დან 10.5%-მდე გაზარდა.