სახელმწიფომ ხუდონჰესის პროექტი გამოისყიდა
სახელმწიფომ ინვესტორისგან ხუდონჰესის პროექტი გამოისყიდა.
როგორც ეკონომიკის მინისტრმა ლევან დავითაშვილმა განაცხადა, პროექტის გამოსყიდვა სახელმწიფოს 13.5 მლნ დოლარი დაუჯდა.
მისი თქმით, პროექტი სახელმწიფოს აქტიური მონაწილეობით განხორციელდება.
"ინვესტორ კომპანიასთან შედგა შეთანხმება და სახელმწიფომ პროექტი დაიბრუნა, რაც საშუალებას მოგვცემს, უკვე პროექტის განხორციელება 2023 წელს დავიწყოთ. ამ პროექტს განსაკუთრებული მნიშვნელობა და დატვირთვა ჰქონდა საქართველოს ელექტროსისტემისთვის, ზოგფადად სისტემის გენერაციისთვის, მათ შორის იგივე არსებული ენგურჰესის მუშაოების ეფექტიანობის გაზრდისთვის, შესაბამისად ჩვენი გადაწყვეტილება, რომ კომპანიასთან მოლაპარაკების გზით დაგვესრულებინა კონტრაქტი, საბოლოოდ პოზიტიურად გადაწყდა და მთავრობა მიიღო გადაწყვეტილება, რომლითაც შეთანხმება შედგა, აქედან გამომდინარე, ამ პროექტს 2023 წლის დასაწყისიდან ხელახლა გამოვაცხადებთ და ხელახლა დავიწყებთ ამ პროექტის განხორციელებას", - აღნიშნა ლევან დავითაშვილმა.
მინისტრი იმედს გამოთქვამს, რომ პროექტის განსახორციელებლად მოსახლეობის მხრიდან მხარდაჭერა იქნება.
"13.5 მილიონი დოლარი იყო ის თანხა, რა თანხაზეც მოხდა მორიგება ინვესტორ კომპანიასთან. ეს არის საქართველოსთვის ხელსაყრელი პირობები, რომ ჩვენ ერთის მხრივ დავიბრუნეთ ის ტერიტორიები, რომელიც კომპანიას ჰქონდა გადაცემული, დავიბრუნეთ უფლებები", - განაცხადა ლევან დავითაშვილმა.
სვანეთში ხუდონჰესის პროექტი ინდურ კომპანია „ტრანს ელექტრიკს“ უნდა განეხორციელებინა. პროექტი მოიცავდა თაღოვანი კაშხლის, მიწისქვეშა ელექტროსადგურის, წყალსაგდებების, წყალმიმღებებისა და სხვა ნაგებობების მშენებლობას. ელექტროენერგიის წლიური გამომუშავება 1.5 მლრდ კვრ.სთ უნდა ყოფილიყო.
