OMV Petrom-ი საქართველოს წყლებში ნავთობისა და გაზის საძიებო ლიცენზიაში $1.6 მლნ-ს გადაიხდის
ავსტრიულ-რუმინული კომპანია OMV Petrom-ი შავ ზღვაზე, საქართველოს წყლებში არსებულ მეორე სალიცენზიო ბლოკზე ლიცენზიისთვის 1.6 მლნ დოლარს გადაიხდის.
წილობრივი განაწილების ხელშეკრულება აღმოსავლეთ ევროპულ კომპანიასთან 25 წლის ვადით, 5 წლიანი გაგრძელების უფლებით გაფორმდება. კომპანიამ პირველი ერთი წელი გარემოზე ზემოქმედების შესწავლას და ანგარიშის მომზადებას უნდა დაუთმოს, კიდევ მაქსიმუმ 6 წელი კი, ნავთობისა და გაზის ძებნის და ბურღვითი სამუშაოების ფაზაა.
რა მოცულობის გაზი ან ნავთობი შეიძლება არსებობდეს ამ ბლოკზე უცნობია, ტერიტორიაზე ფართო კვლევა არ ჩატარებულა.
„ეს ტერიტორია, სადაც OMV შემოდის ყველაზე ნაკლებად არის შესწავლილი, ამიტომ ციფრებზე საუბარი ცოტა სპეკულაციურია, თუმცა მეზობელი ფართობი, უფრო სამხრეთით, შესწავლილია ამერიკული კომპანიის მიერ და იქ საუბარია დაახლოებით, 750 მლნ ტონა ნავთობის ან მისი ექვივალენტი გაზის ოდენობაზე. ჩრდილოეთ ნაწილი, სადაც OMV შემოვიდა მეტად პერსპექტიულად ითვლება და მეტი ფოკუსირება გაზის ძიებაზე იქნება“, - განაცხადა „ბიზნესპარტნიორთან“ „ნავთობისა და გაზის სახელმწიფო სააგენტოს ხელმძღვანელმა გიორგი ტატიშვილმა.
მისი განმარტებით, OMV Petrom-მა შეისწავლა და გადაამუშავა არსებული მასალები, რაც ქართულ მხარეს გააჩნდა და აღმოაჩინა რუმინეთის წყლებში არსებული სტრუქტურების ანალოგიური სტრუქტურები.
ამ ჯგუფს რუმინეთის ტერიტორიულ წყლებში არსებული „დომინოს“ საბადოს აღმოჩენა უკავშირდება და ამ პროექტში ჯგუფმა 1,5 მლრდ აშშ დოლარის ინვესტიცია ჩადო.
„ეს სტრუქტურები ფაქტობრივად იდენტურია, ამიტომ ამ მიმართულებით უფრო დაინტერესდნენ. უფრო ნაცნობი და მიზანშეწონილია მათთვის ამ ბლოკის ათვისება“, - განმარტავს გიორგი ტატიშვილი და აღნიშნავს, რომ სექტორში პერსპექტივა ნამდვილად ჩანს.
„მსოფლიოსთვის ურთულეს პერიოდში მიიღო საინვესტიციო გადაწყვეტილება და შეხვიდე ისეთ ქვეყანაში, რომელიც არ არის ნავთობის და გაზის მრეწველების ტოპ-სიაში, ძალიან მნიშვნელოვანია და უპირობოდ ადასტურებს იმ პერსპექტივებს და საინვესტიციო გარემოს მიმზიდველობას რაც ქვეყანაში გვაქვს“, - მიიჩნევს გიორგი ტატიშვილი.
აღსანიშნავია, რომ შავი ზღვის აუზის ქვეყნებიდან საძიებო ოპერაციები ხორციელდება თურქეთში, რუსეთში, ბულგარეთში, რუმინეთსა და უკრაინაში.
საქართველოში მესამე სალიცენზიო ბლოკზე საერთაშორისო ტენდერი მიმდინარეობს, სადაც წინადადებების წარდგენის ვადა მაისში დასრულდება.
ფოტო: energynomics.ro
