Helios Energy მომხმარებლებს აივნებისთვის განკუთვნილ მზის პანელებს შესთავაზებს
კომპანია Helios Energy ახალ პროექტზე მუშაობს, რომელიც ტესტირების ეტაპზეა და სექტემბრიდან მომხმარებლებს აივნებისთვის განკუთვნილ პანელებს შესთავაზებს.
მზის პანელების დამონტაჟება ნებისმიერ მსურველს შეეძლება. პროექტის მთავარი მიზანი განახლებადი ენერგიების ყოველდღიურ ცხოვრებაში გამოყენების კიდევ უფრო წახალისებაა.
"ამას საბოლოოდ საქართველოს ენერგეტიკისთვის საერთო სარგებლის მოტანა შეუძლია. ასევე ვმუშაობთ კიდევ ერთ საპილოტე პროექტზე, რაც თბური ტუმბოების ტექნოლოგიის გამოყენებით კონკრეტული შენობის 100% ელექტროენერგიაზე გადაყვანას გულისხმობს"-ამის შესახებ Helios Energy-ს დამფუძნებელმა თორნიკე დარჯანიამ "ბიზნესპარტნიორთან" ინტერვიუში განაცხადა.
შეგახსენებთ, რომ Helios Energy ბაზარზე 2017 წლიდან გამოჩნდა და ამ დროისთვის კომპანიას გერმანიაში 3, საქართველოში კი 10 მეგვატზე მეტი სიმძლავრის მზის ელექტროსადგური აქვს დამონტაჟებული.
