ჭკვიანი მრიცხველების დანერგვა ელექტროენერგიას არ გააძვირებს
ჭკვიანი მრიცხველების დანერგვის შემდეგ ენერგეტიკისა და წყალმომარაგების მარეგულირებელი ეროვნული კომისია ელექტროენერგიაზე ტარიფების მატებას არ ელოდება.
„სამი სცენარი გვქონდა მომზადბული. ერთი, ყველაზე სწრაფი, რომელიც ძალიან მალე ანაცველბდა არსებულ მრიცხველებს ჭკვიანი მრიცხველებით, თუმცა ამ შემთხვევაში ინვესტიციების მოცულობიდან გამომდინარე ეს გარკვეულ ზეწოლას ქმნიდა ტარიფზე და ის შეიძლებოდა გაზრდილიყო. ჩვენ ამაზე უარი ვთქვით. მეორე სცენარი იყო ძალიან გრძელ ვადაში გაწელვა, ასევე ინვესტიციების მოცულობიდან გამომდინარე. თუმცა მესამე სცენარი, რომელიც ჩვენთვის ყველაზე მისაღები აღმოჩნდა, ეს არის რამდენიმე წელიწადზე გათვლილი ეტაპობრივი გადასვლა. ამ სცენარში კარგი ის არის, რომ ყველაზე იქნება გათვლილი - ფიზიკური პირი, იურიდიული პირი, თუ ნებისმიერი სხვა სახელმწიფო უწყება, ყველაზე ერთნაირად გავრცელდება. შესაბამისად, როდესაც დასრულდება ეს რამდენიმე წლიანი პროექტი, ყველა მომხმარებელს ექნება ჭკვიანი აღრიცხვის სისტემა. ეს ერთი მხრივ ინვესტიციაა, მაგრამ მეორე მხრივ საოპერაციო ხარჯების შემცირებაა. ეს ერთმანეთის წონადი იქნება და დააბალანსებს. აქედან გამომდინარე ტარიფზე დამატებით ზეწოლას ავირიდებთ“,- აღნიშნა სემეკ-ის წევრმა, გიორგი ფანგანმა.
მანვე „ბიზნესპარტნიორთან“ ე.წ სმარტ მრიცხველების შესაძლებლობებზეც ისაუბრა.
„როდესაც ელექტროენერგიის ახალ ბაზარზე გადავალთ, ვინც უშუალოდ ენერგეტიკულ ბირჟაზე ივაჭრებს, ფასები სულ ცვალებადი იქნება. შესაბამისად, შესაძლებელია განსხვავებული ტარიფები იყოს დღისა და ღამის განმავლობაში. მაგრამ ჩვეულებრივი მრიცხველით შეუძლებელია იმის დადგენა, დღის განმავლობაში მოიხმარა, თუ ღამის განმავლობაში. ჭკვიანი მრიცხველები ზუსტად გვეუბნებიან რომელ საათში რამდენი კილოვატი იყო მოხმარებული. შესაბამისად, როდესაც ფასს მიუყენებ, უკვე გამრავლდება იმის მიხედვით, როდის იყო მოხმარებული“,- განმარტავს ფანგანი.
