TBC Capital: უცხოურ ვალუტაში ჭარბი ლიკვიდობა ლარისათვის ნეგატივია
TBC Capital-ის მთავარი ეკონომისტი განახლებულ ანგარიშში აღნიშნავს, რომ აგვისტოში ეკონომიკის 10.5%-იანი ზრდა თანხვედრაშია საინვესტიციო ბანკის ბოლო, სრული 2022 წლისათვის 10.6%-იან საბაზო სცენართან. ამასთან, მისივე თქმით, ბოლოდროინდელი დინამიკა მცირედით, თუმცა მაინც უფრო მეტ ეკონომიკურ აქტივობაზე მიუთითებს.
გასულ კვირას ასევე გამოქვეყნდა მე-2 კვარტალის საგადასახდელო ბალანსისა და მშპ-ს დანახარჯების მიხედვით გაანგარიშების ამსახველი მაჩვენებლები.
მიმდინარე ანგარიშის დეფიციტის გაუმჯობესება და საინვესტიციო მოთხოვნის მკვეთრი მატება ეკონომიკის ზრდის მსგავსად, TBC Capital-ის მოლოდინების შესაბამისია.
პუბლიკაციის მიხედვით, საგარეო ბალანსის გაუმჯობესებასთან ერთად, გრძელდება საბანკო სექტორში უცხოურ ვალუტაში ჭარბი ლიკვიდობის დაგროვება. აღსანიშნავია, რომ ეს მხოლოდ მიგრანტების მზარდი დეპოზიტების შედეგი არაა. არამედ, სეზონური გაუფასურების მოლოდინების გამო, ბოლო პერიოდში რეზიდენტების მხრიდანაც ვალუტაში მეტად დაზოგვა და ლარში მეტად სესხება იკვეთება. თავისთავად, ეს ლარის კურსისათვის ნეგატიურია, თუმცა, საპირისპიროდ, მას შემდეგ რაც აღნიშნული ტენდენცია შეიცვლება.
ეკონომისტი მიიჩნევს, რომ ეს მნიშვნელოვანია, რადგანაც სესხებისა და დეპოზიტების სავალუტო კომპოზიცია ლარის კურსს ხშირად მიმდინარე ანგარიშის ბალანსზე უფრო მეტადაც კი განსაზღვრავს.
„როდის შეიძლება ველოდეთ განწყობებში ცვლილებებს? სავარაუდოდ წელსვე, როდესაც ბაზრის მონაწილენი უფრო მეტი რწმუნებით ჩათვლიან, რომ ლარის სეზონური ფაქტორები მის სადღეისო კურსში უკვე წინმსწრებად ასახულია. ამ მხრივ, ასევე საყურადღებოა, რომ ძლიერი საინვესტიციო მოთხოვნა, უცხოურ ვალუტაში მეტი ბიზნეს სესხის გაცემას ნიშნავს, რადგანაც გრძელვადიანი ბიზნეს პროექტების დაფინანსება სწორედ პრაქტიკულად მთლიანად უცხოურ ვალუტაშია.“
ასევე, როგორც TBC Capital-ის ანგარიშში ვკითხულობთ, რეკორდულად დაბალი საპროცენტო განაკვეთები დოლარის დეპოზიტებზე მათი თუნდაც ნაწილის გახარჯვას განაპირობებს, რაც როგორც ეკონომიკის ზრდის, ასევე ლარის კურსის კუთხით თავისთავად პოზიტივია.
