თამაზ დაუშვილი FDI-ზე: რაც დავთესეთ იმ შედეგს ვიმკით
2020 წლის პირველ კვარტალში პირდაპირი უცხოური ინვესტიციების კლების ერთ-ერთ მიზეზად კერძო სექტორის ნაწილი ვაქცინაციის პროცესის დაგვიანებას ასახელებს. ბიზნესი მიიჩნევს, რომ საერთაშორისო ინვესტორებმა საქართველოში თანხის დაბანდებისგან თავი რთული ეპიდემიოლოგიური ვითარების გამო შეიკავეს.
„სამწუხაროა, რომ შარშან ვერ მოვახერხეთ ვაქცინის შემოტანისა და პროცესის დაწყების ისე დაგეგმვა, რომ პირველ კვარტალში ეკონომიკისა და ინვესტიციების ზრდის უკეთესი შედეგები გვქონოდა. ჩვენი ქვეყანა გლობალურ ეკონომიკურ კონკურენციაშია. ის ინფორმაცია, რომ საქართველოში კოვიდ მდგომარეობა რთული იყო, მიდიოდა ინვესტორებთანაც“, - განაცხადა „ბიზნესპარტნიორთან“ „დიოს“ მმართველმა პარტნიორმა, თამაზ დაუშვილმა.
ბიზნესმენის თქმით, რთულ ეპიდემიოლოგიურ ვითარებას საქართველოში მსხვილი საინვესტიციო პროექტების მიმართ სკეპტიკური განწყობაც ემატება.
„სამწუხაროდ, ამ თვალსაზრისით არც ისე სახარბიელო ფონი გვაქვს. თუ გავითვალისწინებთ იმასაც, რომ ახლა მოსახლეობაში რბილად რომ ვთქვათ, ჰესების მიმართ სკეპტიკური დამოკიდებულებაა. ეს აუარესებს საინვესტიციო გარემოს და ძალიან დიდი პრობლემაა. თუმცა, ეს დღეს და გუშინ არ დაწყებულა. ინვესტორთან მიდგომა, დამოკიდებულება უკვე რამდენიმე წელია შეიცვალა. ეს თემა პოპულისტური გახდა. ვთქვათ, იგივე ქართულ მიწებთან დაკავშირებით იყო, ინვესტორი საიდან მოდის, რომელი ქვეყნიდან მოდის, რა ტიპის არისო. ეს საკითხი უფრო პოლიტიზებული გახდა. აქედან გამომდინარე ვიმკით იმ შედეგს, რასაც ვიმკით. ახლა მთავრობამ მოსახლეობასთან რაც შეიძლება მეტი უნდა იმუშაოს იმისთვის, რომ აუხსნას, რისთვის არის საჭირო ინვესტორი. ინვესტორები საქართველოში იმისთვის არ მოდიან, რომ ქართული მიწა აიღონ, გუდაში ჩადონ და წაიღონ. ისინი მოდიან იმისთვის, რომ სარგებელი მოუტანონ ამ ქვეყანას და თავის კომპანიებს. ფონი სერიოზულად გაფუჭდა და ახლა მის გამოსწორებას და აღდგენას გარკვეული დრო დასჭირდება“,- აღნიშნა დაუშვილმა.
