საქართველოში საერთაშორისო სტანდარტების ლოგისტიკური ცენტრი აშენდება
საქართველოში საერთაშორისო სტანდარტების ლოგისტიკური ცენტრი აშენდება. ამ მიზნით, საქართველოში საერთაშორისო გადამზიდავი კომპანია FedEx-ის ლიცენზირებულმა წარმომადგენლობამ აშშ-ს საერთაშორისო განვითარების საფინანსო კორპორაციასთან ფინანსური შეთანხმება გააფორმა, საიდანაც 4 მილიონი დოლარის მოცულობის გრძელვადიანი დაფინანსება მოიზიდა. FedEx-ის ლიცენზიანტმა “საინფორმაციო კომუნიკაციების სისტემებ“-მა ასევე საკუთარი საინვესტიციო კაპიტალის მობილიზებაც მოახდინა და პროექტის ჯამური საინვესტიციო მოცულობამ 6 მლნ დოლარი შეადგინა. ლოგისტიკური ცენტრი თბილისის საერთაშორისო აეროპორტთან ახლოს, 10 000 კვ/მ-ზე 18 თვეში აშენდება, სადაც 150-მდე სამუშაო ადგილი შეიქმნება.
"საქართველოში ამ პროექტის ანალოგი არ არსებობს. ლოგისტიკური ცენტრი FedEx -ის გადაზიდვებს მოემსახურება, თუმცა მისი საკვანძო და მნიშვნელოვანი ფუნქცია იმაში მდგომარეობს, რომ პროექტი საქართველოში მოქმედ მცირე თუ დიდ კომპანიებს ლოგისტიკური სერვისის გატანის შესაძლებლობას მისცემს. შესაბამისად, კომპანიებს საკუთარი საწყობების შეძენა და მართვა არ მოუწევთ, რაც მათ დიდი თანხების ეკონომიის საშუალებას მისცემს. კომპანიებთან თანამშრომლობით ჩვენ ვაწარმოებთ მათი პროდუქციის შენახვას, აღწერას, ქსელის ყოველდღიურ მომარაგებას. მოხარულები ვართ, რომ საქართველოში პირველად მოვახდენთ ამ კონცეფციის დანერგვას"- აცხადებს "საინფორმაციო კომუნიკაციების სისტემების" აღმასრულებელი დირექტორი ნინო მენთეშაშვილი.
მისი თქმით, ახალი ლოგისტიკური ცენტრი ასევე ხელს შეუწყობს საქართველოში ელექტრონული კომერციის განვითარებას, რადგან ახალი საწყობის მომსახურება დაკავშირებული იქნება ელექტრონულ პლატფორმებთან და პროდუქციის მიწოდება მაღაზიების ძალისხმევის გარეშე, ლოგისტიკის ცენტრის მეშვეობით მოხდება.
