რამდენი დაიხარჯა მესტიის ხეობაში სათხილამურო საბაგიროების მოწყობაზე

მესტიაში სამთო-სათხილამურო კურორტების განვითარების მიზნით საბაგიროების მშენებლობისათვის 18 მილიონი ევრო სესხი და 700 000 ევრო გრანტი გამოიყო. საფრანგეთის მთავრობასთან შესაბამისი ხელშეკრულება 2011 წელს გაფორმდა.

ხელშეკრულების თანახმად, გრანტი განკუთვნილია მესტიის ხეობის ტურისტული განვითარების ძირითადი გეგმის შემუშავებისა და საქართველოში ზამთრის სპორტის განვითარებისათვის. შეღავათიანი სესხი კი განკუთვნილია, მესტიის ხეობის სათხილამურო საბაგირო აღჭურვილობის შესაძენად.

პროექტის ფარგლებში, ჰაწვალში ორი საბაგიროს მიწოდება/ინსტალაცია უკვე დასრულდა, თეთნულდში 5 საბაგიროს მოწყობილობა მიწოდებულია, აქედან 4 საბაგირო ექსპლუატაციაშია შესული. დარჩენილია 1 საბაგიროს გზის ტესტირებისა და ექსპლუატაციაში მიღებასთან დაკავშირებული სამუშაო. სამუშაოების დასრულება დაგეგმილია 2021 წლის ბოლოსთვის.

ფინანსთა მინისტრის მოადგილის გიორგი კაკაურიძის განცხადებით, სესხიდან დახარჯულია 17,2 მლნ ევრო, გრანტიდან 560 000 ევრო.

გრანტის ნაწილში 138 410 ევრო აუთვისებელია, რომელიც ხელშეკრულების ცვლილების დოკუმენტის თანახმად, მიემართება მესტიის სათხილამურო კურორტის მენეჯმენტის სპეციფიკური ტრენინგის დასაფინანსებლად.  

„ამ ეკონომიას ეცვლება მიზნობრიობა. რაც გათვალისწინებული იყო კვლევებისთვის, ახლა უკვე გათვალისწინებულია ამ საბაგიროზე დასაქმებული პირების შესაბამისი ტრენინგებისთვის, რათა მათ სრულყოფილად შეძლონ საბაგიროს ექსპლუატაცია და მათი მომსახურება“,- აღნიშნა გიორგი კაკაურიძემ.