პრემიერი: ომის დაწყებიდან დღემდე ევროპიდან რუსეთში $90 მილიარდი შევიდა
პრემიერ-მინისტრი დადებითად აფასებს მთავრობის გადაწყვეტილებას რუსეთთან ეკონომიკური ურთიერთობების ჩვეულებრივ რეჟიმში გაგრძელების შესახებ.
ირაკლი ღარიბაშვილს მაგალითად ევროკავშირი მოჰყავს და ამბობს, რომ ომის მიუხედავად სავაჭრო ურთიერთობები რუსეთსა და ევროპულ გაერთიანებას შორის არ შეწყვეტილა. შედეგად აგრესორმა ქვეყანამ ევროკავშირისგან $90 მილიარდი მიიღო.
"წარმოვიდგინოთ, რომ ჩვენს მთავრობას არ გამოეჩინა წინდახედულობა, არ გაეტარებინა ჩვენი ქვეყნის ეროვნული ინტერესების პოლიტიკა და მიგვეღო გაუაზრებელი და ემოციური გადაწყვეტილება. მოგვესმინა ჩვენი ქვეყნის შიდა მტრებისთვის, რომლებსაც სურდათ ჩვენი ქვეყნის ომში ჩაბმა. ასეთ შემთხვევაში ინვესტიციები კი არა არაფერი აღარ იქნებოდა. ჩვენი მილიონი თანამოქალაქე ცხოვრობს რუსეთში. ვინმეს ახსენდება ისინი როგორ შოულობენ, როგორ მოღვაწეობენ რუსეთში და მათ რა ბედი ელით? 4 მილიონი ჩვენი მოქალაქე, რომელიც საქართველოში ცხოვრობს, იმათ რა ბედი ელოდათ? რა მოხდებოდა მათ წინააღმდეგ? ევროკავშირი რუსეთს ყოველდღე უხდის მილიარდ დოლარს ომის დაწყებიდან დღემდე რუსეთში შევიდა $90 მილიარდი იმ ვაჭრობის შედეგად, რომელიც რუსეთს დღემდე აქვს ევროპასთან",- განაცხადა ღარიბაშვილმა.
