ნათია თურნავა: ვმსჯელობთ, რა ფორმით შენარჩუნდეს საპარტნიორო ფონდი
ეკონომიკის მინისტრის ნათია თურნავას განცხადებით, საპარტნიორო ფონდის რეფორმირებას მეტი დრო და განსხვავებული მიდგომა სჭირდება.
“საპარტნიორო ფონდი არის ერთ-ერთი საწარმო, თუმცა მას განსაკუთრებული ფუნქცია ეკისრა - ეს არ არის უბრალოდ საწარმო, ეს არის საინვესტიციო ფონდი, მის რეფორმირებას ცოტა უფრო მეტი დრო და განსხვავებული მიდგომა სჭირდება, რადგან კონკრეტული ეკონომიკური პოლიტიკის მიზანს ემსახურება, რაც არის იგივე კაპიტალის დანაკლისის შევსება ბაზარზე და სხვადასვა ბიზნესების დახმარება. ეს პროცესი მიმდინარეობს. ჩვენ ვმსჯელობთ რა ფორმით უნდა შენარჩუნდეს საპარტნიორო ფონდი. ეს არ არის მარტო ეკონომიკის სამინისტროს საქმე, ამაზე მთლიანად ეკონომიკური გუნდი ვმსჯელობთ.
ჩემი პირადი აზრია, რომ ვინაიდან პოსტპანდემიურ პერიოდში ზოგადად კერძო ბიზნესს, მცირე საწარმოებს მოაკლდათ არა მხოლოდ სესხი, არამედ კაპიტალის დანაკლისია, ამიტომ აქტუალობას ეს ინსტიტუტი არ კარგავს, მაგრამ რა თქმა უნდა, უნდა მოხდეს მისი კორპორატიზაცია, მენეჯმენტის საუკეთესო სტანდარტების დანერგვა, პროცედურების დანერგვა და დაფინანსების წყაროებზე უფრო მეტი მსჯელობა“,- აღნიშნა ნათია თურნავამ.
