ლაშა ხუციშვილი: სახელმწიფო საწარმოების რეფორმა საჩქაროა
ფინანსთა მინისტრის ლაშა ხუციშვილის განცხადებით, ფინანსური მდგომარეობის თვალსაზრისით, სახელმწიფო საწარმოებში არასახარბილო მდგომარეობაა.
მისი თქმით, ამაზე გავლენა პანდემიამაც მოახდინა.
მინისტრი მიიჩნევს, რომ სახელმწიფო საწარმოების რეფორმა საჩქაროა.
"სახელმწიფო საწარმოების რეფორმა აუცილებელი, პრიორიტეტული და საჩქაროა. ამ მიმართულებით, ფინანსთა სამინისტრო მუშაობს. გვყავს დონორი ორგანიზაციები, რომლებიც პროცესში ჩართულები არიან. საერთაშორისო სავალუტო ფონდის პროგრამის ერთ-ერთი მნიშვნელოვანი საკითხი იქნება სახელმწიფო საწარმოების რეფორმა, ამ ეტაპზე მიმდინარეობს მოლაპარაკება. სახელმწიფო საწარმო ბიუჯეტის ტვირთი არ უნდა იყოს და მათ ქვეყნის ეკონომიკის განვითარებაში საკუთარი როლი უნდა შეასრულონ", - აღნიშნა ლაშა ხუციშვილმა.
მისი თქმით, ამ ეტაპზე წამგებიანი სახელმწიფო საწარმოების პრივატიზაცია შეუძლებელია.
"მნიშვნელოვანია, დროულად განხორციელდეს შესაბამისი რეფორმები სახელმწიფო საწარმოებში, რაც იმის საშუალებას მოგვცემს, რომ მათი დიდი ნაწილის პრივატიზაცია განხორციელდეს", - განაცხადა ლაშა ხუციშვილმა.
