ლაშა ხუციშვილი ლარის კურსის დიდ რყევებს არ ელის

ფინანსთა მინისტრს უჭირს პროგნოზირება, რა ნიშნულზე დასტაბილურდება ეროვნული ვალუტა. თუმცა, ლაშა ხუციშვილი ვარაუდობს, რომ მომდევნო პერიოდი ლარის კურსის რყევების გარეშე ჩაივლის.

"ლარის კურსის კონკრეტული პროგნოზირება შეუძლებელია. თუმცა, მის განმაპირობებელ ფაქტორებზე საუბარი შეგვიძლია. ეკონომიკური მიმართულებით ახალი რეალობა გვაქვს. აპრილიდან მოყოლებული პროგნოზებს გადავხედეთ და ეკონომიკური ზრდის მაჩვენებელი გავზარდეთ 6.5%-მდე. გასული წლის ეკონომიკური კლება წელს სრულად კომპენსირდება. მიმდინარე წელს ზრდა იქნება იმაზე მაღალი, ვიდრე კლება იყო გასულ წელს.

დადებითი მაჩვენებლებია ექსპორტის მიმართულებითაც. 145%-ითაა გაზრდილი ფულადი გადმორიცხვებიც. ყველა ეს ფაქტორი ეკონომიკაში ახალ რეალობას ქმნის და შესაბამისად, რეალობის ასახვა ხდება ლარის კურსზეც. კონკრეტულად რა ნიშნული იქნება ეს ძალიან მალე გამოჩნდება. ვფიქრობ, მომდევნო პერიოდი იქნება უფრო სტაბილური დიდი რყევების გარეშე",- განაცხადა ფინანსთა მინისტრმა.