კობა გვენეტაძე: ინფლაცია მიზნობრივი დონისგან მეტწილად განსხვავებული იქნება
ეროვნული ბანკის პრეზიდენტი მომდევნო წლებში ინფლაციაზე მოქმედ შესაძლო რისკებს შორის კორონა ვირუსის პანდემიასა და რეგულირებადი ფასების ცვლილებას ასახელებს.
„მომდევნო სამი წლის განმავლობაში შესაძლო არაპროგნოზირებადი შოკების კატეგორიას მიეკუთვნება Covid-19-ის პანდემიიდან მომდინარე დამატებითი რისკები, რეგულირებადი ფასების ცვლილება, მსოფლიო ბაზრებზე საკვების ფასების ცვლილება, გეოპოლიტიკური რისკების ცვლილება, ძირითადი სავაჭრო პარტნიორი ქვეყნებიდან ინფლაციის იმპორტი და სხვა. ამასთან, რისკები შეიძლება მიმართული იყოს ფასების, როგორც ზრდის, ასევე შემცირებისკენ“,- განმარტა ეროვნული ბანკის პრეზიდენტმა, კობა გვენეტაძემ.
მისივე თქმით, ინფლაცია ზრდის, ან შემცირების მიუხედავად მიზნობრივი მაჩვენებლისკენ იმოძრავებს.
„საშუალო ვადიან პერიოდზე ფოკუსირებას განსაკუთრებული მნიშვნელობა აქვს იმის გამო, რომ შოკები მუდმივად ხდება. ინფლაცია მიზნობრივი დონისგან მეტწილად განსხვავებული იქნება. ის ზოგჯერ ინფლაციის მიზნობრივ მაჩვენებელზე უფრო მაღალი, ზოგჯერ კი დაბალი იქნება. თუმცა, ეროვნული ბანკის მიერ გატარებული პოლიტიკის შედეგად, საშუალოვადიან პერიოდში ის ყოველთვის ამ მაჩვენებლისკენ იმოძრავებს“,- აღნიშნა გვენეტაძემ.
