ქართულ კომპანიებს EU-ს საჯარო უწყებებისთვის პროდუქციის მიწოდების შესაძლებლობა აქვთ
ქართული კომპანიებისთვის ევროკავშირის ბაზარი გაიხსნა, სადაც წლის განმავლობაში 250 000-ზე მეტი საჯარო შემსყიდველი 2 ტრილიონი ევროს ღირებულების პროდუქციას ყიდულობს.
ეკონომიკის მინისტრის ლევან დავითაშვილის განცხადებით, ქართული კომპანიებისთვის ჩნდება შესაძლებლობა, ევროპის 27 ქვეყანაში პროდუქცია გაიტანონ.
"ეს არის საქართველოს მიერ ასოცირების დღის წესრიგით განსაზღვრული ვალდებულებების სრულყოფილად შესრულების შედეგი. ქართულ კომპანიებს უჩნდებათ შესაძლებლობა, ევროპის 27 ქვეყანაში მოახერხონ პროდუქციის მიწოდება იმ საჯარო უწყებებისთვის, რომლებიც საჯარო შესყიდვებით არიან დაინტერესებულები. ვფიქრობ, ეს ქართული ბიზნესისთვის ახალი სტიმული იქნება. ეს არის მნიშვნელოვანი წინ გადადგმული ნაბიჯი, საქართველოს ევროპულ ეკონომიკურ სივრცეში ინტეგრაციის კუთხით", - აღნიშნა ლევან დავითაშვილმა მთავრობის სხდომის დასრულების შემდეგ.
