ირინა კვახაძე: ბინის ქირის ფასი არაბუნებრივადაა გაზრდილი
ბინის ქირის ფასი არის გადაჭარბებული, შეიძლება ითქვას, რომ არაბუნებრივად გაზრდილი, რაც დროებით ფაქტორებს, კერძოდ მიგრაციას უკავშირდება, - ამის შესახებ „ბიზნესპარტნიორს“ თიბისი კაპიტალის კვლევების სამსახურის უფროსმა ირინა კვახაძემ განუცხადა.
მისი თქმით, 2023 წლის ბოლო 2 თვეში, თვიურ ჭრილში, ქირის ფასი შედარებით შემცირდა, თუმცა მაინც უფრო მაღალია, ვიდრე იყო მიგრაციამდე.
„ფასის წლიური ზრდის მაღალი ტემპების მიუხედავად, აპრილსა და მაისში ქირა, თვე-თვესთან შედარებით, შემცირდა. ჩვენ ველოდებით, რომ საშუალოვადიან პერიოდში ბინის ქირა შემცირდება და დაუბრუნდება გრძელვადიან საშუალოს. თუმცა, 2023 წელს ის მაინც მაღალ ნიშნულზე შენარჩუნდება, 2021 წელთან შედარებით.
რაც შეეხება წლიურ შემცირებას, ეს უკვე 2024 წლიდან უნდა ვიხილოთ“, - აღნიშნა ირინა კვახაძემ. მისივე თქმით, თბილისში არ დარჩენილა უბანი, სადაც ქირის ფასმა არ მოიმატა.
ქირის ფასი რომ არაბუნებრივად გაზრდილია მიუთითა ეროვნულმა ბანკმაც, რომელმაც გასულ კვირას განცხადება გაავრცელა და განაცხადა, რომ უძრავი ქონების ქირის ფასი დღეს 30%-ით აღემატება ტრენდს. მთავარ მიზეზად ქირაზე გაზრდილი ფასებისა, მიგრანტების დიდი ნაკადის შემოდინება და გაზრდილი მოთხოვნა სახელდება, რასაც მიწოდება ვერ აკმაყოფილებს.
ცნობისთვის, 2023 წლის მაისში უძრავი ქონების ქირა წლიურად, დოლარში 45%-ით, ხოლო ლარში თითქმის 24%-ით გაიზარდა. დარგის ექსპერტები ამბობენ, რომ ბინის ქირის ზრდა წინა წელს დაიწყო და 2021 წელთან შედარებით, 145 %-იანი ზრდაც კი დაფიქსირდა.
