ირაკლი ღარიბაშვილი: 2021 ეკონომიკის გაჯანსაღების წელია

პრემიერ-მინისტრის ირაკლი ღარიბაშვილის შეფასებით, პანდემიამ უპრეცედენტო მსოფლიო ეკონომიკური კრიზისი გამოიწვია, რაც საქართველოს მოქალაქეების კეთილდღეობაზე მძიმედ აისახა.

მისი თქმით, პანდემიის გამო საქართველოს ეკონომიკა 6.2%-ით შემცირდა, თუმცა ამ პერიოდში არ შეჩერებულა არცერთი ინფრასტრუქტურული პროექტი, სასოფლო-სამეურნეო სამუშაოები. არ გაჩერებულა წარმოების მნიშვნელოვანი დარგები.

“სახელმწიფომ სხვადასხვა პირდაპირი დახმარებისა თუ შეღავათების სახით მაქსიმალური დახმარება გაუწია მეწარმეებსა და დასაქმებულ ადამიანებს. დროის მოკლე პერიოდში საერთაშორისო საფინანსო ინსტიტუტებიდან მოვიზიდეთ 2.1 მლრდ დოლარის დაფინანსება, ამან შესაძლებელი გახადა პანდემიის საპასუხო ღონისძიებების სრული დაფინანსება და მარკოეკონომიკური სტაბილურობის შენარჩუნება“, - აღნიშნა ირაკლი ღარიბაშვილმა.

პრემიერის განცხადებით, მთავრობამ შეიმუშავა ჯანდაცვის, სოციალური და ბიზნესის მხარდაჭერის პაკეტები. ჯანდაცვის ხარჯებმა 900 მლნ ლარი შეადგინა, ბიზნესის მხარდაჭერის ხარჯებმა 3 მლრდ ლარი. მოქალაქეთა სოციალური დაცვის ღონისძიებება 1.3 მლრდ ლარი.

“წელს პანდემიის გავლენის შემცირებასთან ერთად ეკონომიკის გაჯანსაღების წელია. შეგახსენებთ, აპრილში ექსპორტის 70%-იანი ზრდა პანდემიამდე არსებულ მონაცემებსაც აღემატება და ნათლად მიანიშნებს გაუმჯობესების ტენდენციაზე“,- განაცხადა პრემიერმა პარლამენტში, სადაც ანგარიშს წარადგენს.