IMF: საქართველოში ტურიზმის სექტორის 2019 წლის მაჩვენებლებზე დაბრუნებას 2024 წლისთვის ველით
IMF საქართველოში ტურიზმის სექტორის 2019 წლის მაჩვენებლებზე დაბრუნებას 2024 წელს ვარაუდობს. „საერთაშორისო სავალუტო ფონდის“ მისიის ხელმძღვანელი საქართველოში, სელიმ ჩაკირი „ბიზნეპარტნიორთან“ აცხდებს, რომ ეკონომიკაში ტურიზმის წილიდან გამომდინარე მისი ჩანაცვლება რომელიმე სხვა ინდუსტრიით ქვეყნისთვის საკმაოდ რთული იქნება.
„ძალიან ძნელი იქნება ტურიზმის რამით ჩანაცვლება. მას ძალიან დიდი როლი აქვს. ვიმედოვნებთ, კრიზისი დროებითა და მომავალ წელს ის დასრულდება. როგორც კი ეს მოხდება, ველით, რომ სექტორის აღდგენა დაიწყება. თუმცა, ასევე ვფიქრობთ, რომ შოკი, რომელიც ინდუსტრიამ მიიღო ცოტა უფრო გაჭიანურდება. 2019 წლის მაჩვენებლებზე დაბრუნებას მხოლოდ 2024 წლისთვის ველით“,- აღნიშნა ჩაკირმა.
მანვე რამდენიმე სექტორი დაასახელა და მთავრობას მათთვის მეტი ყურადღების დათმობა ურჩია. ერთ-ერთია სოფლის მეურნეობის მიმართულება.
„რა თქმა უნდა, ტურიზმის სექტორის მიღმა, როდესაც ჩვენ საქართველოს ეკონომიკას ვუყურებთ, ვხედავთ არაერთ შესაძლებლობას, რომელიც ქვეყანას რეგიონში ღირებულებების ცვლილებასთან ერთად ეძლევა. ქვეყნის ლოგისტიკური მდებარეობა, თავისუფალი სავაჭრო ხელშეკრულებები ევროკავშირსა და ჩინეთთან. ქვეყანას ასევე აქვს შესაძლებლობა მიიღოს სარგებელი აღმოსავლეთსა და დასავლეთს შორის სავაჭრო ურთიერთობების გაღრმავებით. ვიცით, რომ ამ თვალსაზრისით მნიშვნელოვანი როლი აქვს, მაგალითად, ბაქო-თბილისი-ყარსის რკინიგზას. დიდ პოტენციალს ვხედავთ სოფლის მეურნეობის მიმართულებითაც. თუმცა, ყველაზე მნიშვნელოვანი მაინც სტრუქტურული რეფორმებია, რომლის მიზანიც ადამიანურ კაპიტალის დაგროვება, პროდუქტიულობის გაზრდა, ინსტიტუციების ხარისხის გაღრმავება და ინოვაციები უნდა იყოს. სწორედ ეს ყველაფერი დაგეხმარებათ ეკონომიკის დივერსიფიკაციასა და ზრდაში“,- განაცხადა ჩაკირმა.
