ფინანსთა მინისტრი ინფლაციის მიზნობრივ მაჩვენებელთან მიახლოებას 2023 წლის მეორე კვარტალში ელის
ქვეყანაში ინფლაცია ისევ მაღალია და ორნიშნა მაჩვენებელს ინარჩუნებს.
საქსტატის მონაცემებით, ყველაზე მეტად ფასები გაზრდილია სურსათსა და უალკოჰოლო სასმელებზე, სასტუმროს მომსახურებასა და ტრანსპორტზე.
რუსეთ-უკრაინის ომის ფონზე ინფლაციური რისკები გაზრდილია გლობალური ეკონომიკისთვის, ომის ფონზე საქართველოში მიგრანტთა შემოდინება გაიზარდა, რაც წნეხს კიდევ უფრო ზრდის. ამის მიუხედავად, ფინანსთა მინისტრი 2023 წლის მეორე კვარტალში ინფლაციის მიზნობრივ მაჩვენებელთან მიახლოების პროგნოზს ისევ ძალაში ტოვებს.
"ინფლაციამ შემცირება დაიწყო, თუმცა, არა იმ ტემპით, რა ტემპითაც ყველა ვისურვებდით. თუმცა, ის მოლოდინი, რომ 2023 წლის მეორე კვარტალში ახლოს უნდა იყოს მიზნობრივ მაჩვენებელთან, ჯერ კიდევ ძალაშია. ბუნებრივია, ეს ძალიან ბევრ ფაქტორთან არის დაკავშირებული, მათ შორის იმასთან, თუ როგორ განვითარდება საომარი მდგომარეობა უკრაინაში და რა მდგომარეობა იქნება მსოფლიო ეკონომიკაში, ჩვენს რეგიონში. ამ მიმართულებით ძალიან რთულია დღეს პროგნოზების გაკეთება. პროგნოზი ყველა საერთაშორისო საფინანსო ინსტიტუტსაც უჭირს", - აღნიშნა ლაშა ხუციშვილმა.
