ზარაფხანა: ყველაზე გაყიდვადი ნივთი ნიშნობის ბრილიანტის ბეჭედია

„ჩვენი კომპანიის მაგალითზე, ქართველი მომხმარებელი უპირატესობას 1500-დან  2000 ლარამდე ღირებულების ოქროს ნაკეთობებს ანიჭებს“, - ამის შესახებ „ბიზნესპარტნიორს“ საიუველირო სახლი „ზარაფხანას“ აღმასრულებელმა დირექტორმა თორნიკე სამხარაძემ განუცხადა.

რაც შეეხება ყველაზე გაყიდვად ქვას, სხვა ფერად ბუნებრივ ქვებთან შედარებით, განსაკუთრებული მოთხოვნა ბრილიანტზე ფიქსირდება.

„ბიზნესპარტნიორის“ კითხვაზე, რომელი იყო 2022 წლის განმავლობაში ყველაზე გაყიდვადი ნივთი, „ზარაფხანას“ აღმასრულებელი დირექტორი აღნიშნავს, რომ ეს ნიშნობის ბეჭედი იყო.

„ზოგადად, არა მხოლოდ გასულ წელს, ისედაც - ყოველწლიურად, ყველაზე დიდი გაყიდვების მაჩვენებლით გამოირჩევა ნიშნობის ბრილიანტის ბეჭედი და ასევე, ნიშნობის ბეჭედი ტოპაზის და ბრილიანტის თვლებით“, - განმარტა თორნიკე სამხარაძემ.

„ზარაფხანას“ აღმასრულებელი დირექტორის თქმით, 2022 წელი მისი კომპანიისთვის წარმატებული აღმოჩნდა და ოქროს ნაკეთობების გაყიდვები, დაახლოებით, 25%-ით გაიზარდა.

შეგახსენებთ, რომ „ზარაფხანა“ საქართველოში სახლია, რომლის ისტორიაც 1939 წლიდან იწყება. უნდა აღინიშნოს, რომ ქართული საიუველირო ნაკეთობების მწარმოებელი კომპანიისთვის 2022 წელი ცვლილებების იყო. კონკრეტულად კი 2022 წლის პირველ ნახევარში კომპანიის 100%-იანი წილის მმართველი „ნიუ ვიჟენ დეველოპმენტი“ გახდა.

დღეისთვის კომპანია ქვეყნის მასშტაბით ბრენდული საიუველირო ნაკეთობის   5 მაღაზიას მართავს. აქედან 1 ონლაინ მაღაზიაა. კომპანია  100 სამუშაო ადგილს ქმნის.