ვინტილატორი: მეორეული ტანსაცმლის ფასი დაახლოებით 20%-ითაა გაზრდილი
"მეორეული ტანსაცმლის ფასი დაახლოებით 20%-ითაა გაზრდილი",-ამის შესახებ „ბიზნესპარტნიორს“ მეორეული ტანსაცმლის მაღაზია „ვინტილატორის“ დამფუძნებელმა, შორენა ჩაჩუამ განუცხადა.
როგორც მეორეული ტანსაცმლის მაღაზია „ვინტილატორის“ დამფუძნებელი აღნიშნავს, წინა წლებთან შედარებით, ქვეყანაში ვინტაჟური სამოსის მიმართ დამოკიდებულებები მნიშვნელოვნადაა შეცვლილი და მოთხოვნა მზარდია.
„ტენდენცია, რომ მეორეული ტანსაცმელი დაბალი სოციალური სტატუსის მანიშნებელია, ახალგაზრდებში შეიცვალა. ამან კი განაპირობა ის, რომ ბევრი ბიზნესი წამოგვეწია ამ მიმართულებით და ჩვენს ბაზარზეც ძალიან ბევრი ახალი ბიზნესი გაჩნდა.“ -აცხადებს ჩაჩუა.
„ვინტილატორი" ამ ეტაპზე თბილისში ორი მაღაზიითაა წარმოდგენილი. როგორც ჩაჩუა აღნიშნავს, წლის ბოლომდე კომპანია მესამე მაღაზიის გახსნას გეგმავს.
ცნობისთვის, მეორეული ტანსაცმლისა და აქსესუარების მაღაზია „ვინტილატორი“ ბაზარზე 2013 წლიდან ოპერირებს.
მაღაზია მეორეული ტანსაცმლის, აქსესუარებისა და ავეჯის რეალიზაციას ახდენს. ამას გარდა, მომხმარებელს აქვს შესაძლებლობა ადგილზე მიიტანოს ძველი ნივთი, რომელსაც „ვინტილატორში“ ჩაიბარებენ, მის სანაცვლოდ კი მომხმარებელი ქულებს მიიღებს, რომელსაც მაღაზიის პროდუქციაში გადაცვლის.
