"უძრავ ქონებაზე ფასების "პლატოა" და ზრდის ან კლების საფუძველს ვერ ვხედავთ"
ამ ეტაპზე უძრავი ქონების ბაზარზე ფასები სტაბილურ ეტაპზე, „პლატოზეა“ და ფასების არც ქვემოთ და არც ზემოთ წასვლის პროგნოზის საფუძველი არ არსებობს.
ამის შესახებ ტელეკომპანია „პოსტივის“ ეთერში, გადაცემაში „ბიზნეს პოსტი“ უძრავი ქონების ეროვნული ასოციაციის თავმჯდომარემ ვაჟა მებაღიშვილმა განაცხადა.
„პროგნოზებს, როგორც წესი, არ ვაკეთებ, რადგან, საერთაშორისო ორგანიზაციები ასეთ პროგნოზებში ცდებიან ხოლმე. თუმცა ამჟამად ვართ “პლატოზე“, რომელიც ამ ეტაპზე არსებობს. ვერ ვხედავთ საფუძველს, რომ ფასი ქვემოთ წამოვიდეს და ზრდის ნაწილშიც ამას დიდად ვერ ვხედავთ. დოლარის კურსმაც დიდი სხვაობა მოგვცა,“- განმარტა მებაღიშვილმა.
მისი თქმით ეს ასევე ეხება სააგარაკე უძრავ ქონებას - სახლებსა და მიწებს, თუმცა შეიცვლება თუ არა ფასები - ეს რამდენიმე კვირაში გამოჩნდება, როცა ამ სეგმენტში მოთხოვნის „ციებ-ცხელება“ დაიწყება.
