"წარმოებას 3-ჯერ გავზრდით“ - "მისკუზი" ახალ საწარმოში გადავიდა

საქართველოში წარმოებული ეკომეგობრული, ფერადი გორგოლაჭების ბრენდი „მისკუზი“ გაფართოვდა. კომპანია რამდენიმე კვირაა, ახალ საწარმოში გადავიდა, სადაც წარმადობა 3-ჯერ გაიზრდება.

როგორც „ბიზნესპარტნიორს“ ბრენდის თანამდამფუძნებელმა მარიამ ქემოკლიძემ განუცხადა, „მისკუზის“ ახალი საწარმო თანამედროვე დანადგარებით აღიჭურვა.

„როგორც  იცით, როგორც მსოფლიო ბაზარზე, ისე საქართველოში ფერად, ეკომეგობრულ გორგოლაჭებზე ძალიან დიდი მოთხოვნაა. ამიტომ, გავაფართოვეთ წარმოება. თუ აქამდე თვეში მხოლოდ 100 გორგოლაჭს ვამზადებდით, ახლა უკვე 300 გორგოლაჭის წარმოება შეგვიძლია“, - აღნიშნა მარიამ ქემოკლიძემ.

მისივე ინფორმაციით, გაზრდილი წარმადობა კომპანიას შესაძლებლობას მისცემს ადგილობრივი ბაზრის მოთხოვნა დააკმაყოფილოს და ექსპორტზეც გავიდეს.

ამასთან, „მისკუზის“ დამფუძნებლების გეგმებშია, როლერებისთვის სპეციალური დარბაზის გახსნა, დამცავი ინვეტარის შექნა, კერძოდ  - ჩაფხუტების, სამუხლეების და სხვა.

ცნობისთვის, საქართველოში ეკომეგობრული, ფერადი გორგოლაჭების წარმოება  იმპორტირებული ნედლეულით, 2022 წელს დაიწყო.