თოლია: წელს ნაყინის გაძვირება არ იგეგმება

საქართველოში ნაყინის გაყიდვები აქტიურ ფაზაში შევიდა. კომპანიები წარმატებული სეზონის მოლოდინში არიან.

როგორც „ბიზნესპარტნიორს“ კომპანია „თოლიას“ მარკეტინგის მენეჯერმა, სანდრო ლომთაძემ განუცხადა, ბოლო 1 წელში, საქართველოში როგორც ნაყინის ბაზარი, ისე გაყიდვების მაჩვენებელი საგრძნობლად გაიზარდა.

„უკვე სრულიად საქართველოს მასშტაბით შევიდა ჩვენი პროდუქცია სავაჭრო ქსელებში და სეზონის საკმაოდ კარგი სტარტი გვაქვს. თუ შევადარებთ 2023 წლის პირველი იანვრიდან 2023 წლის აპრილის ჩათვლით პერიოდს, 2022 წლის ამავე საანგარიშო პერიოდს, გაყიდვებში 5%-იანი ზრდა გვაქვს. თავის მხრივ, 2022 წელიც წარმატებული იყო 2021 წელთან შედარებით და ბევრად მომგებიანი“, - აღნიშნა სანდრო ლომთაძემ.

„თოლიას“ მარკეტინგის მენეჯერმა რუსეთ-უკრაინის ომის გავლენაზეც ისაუბრა და თქვა, რომ ამ ფაქტმა გასულ წელს ნაყინის გაძვირება განაპირობა.

„ომს გაყიდვების მაჩვენებელზე არ უმოქმედია, მოთხოვნა არ შემცირებულა, თუმცა მოგვიწია ნაყინის ფასების 11-12%-ით დაკორექტირება ზრდის მიმართულებით. ნედლეულის კუთხით რუსეთზე არ ვიყავით დამოკიდებული, თუმცა, გარკვეული პროდუქცია უკრაინიდან შემოგვქონდა და ომის გამო, გაიზარდა როგორც ნედლეულის ღირებულება, ისე ტრანსპორტირების ვადები და ხარჯები. ბუნებრივია, ეს ყველაფერი წინა წელს აისახა უკვე ნაყინის ფასზე. წელს ნაყინის გაძვირება არ განიხილება“, - განმარტა სანდრო ლომთაძემ.

შეგახსენებთ, კომპანია ”თოლია” ქართულ ბაზარზე 26 წელზე მეტია ოპერირებს და ნაყინის, დაახლოებით, 60-ამდე სახეობას აწარმოებს. ამჟამად, კომპანიაში დასაქმებულია 400 ადამიანი.